المسرح وصناعته بين قيم (الزول) وسقوط الاقنعة في حرب الخرطوم
تاريخ النشر: 26th, September 2023 GMT
كان الاجدر للعالم ان يري افكار انتجت في بلادنا وذلك لان السودان منطقة التقاء اسباب السماء باسباب الارض والخرطوم تمثل النظام الاداري لاهلة الذين هم نموذج (للزول) الضكران الشهم اخو الاخوان (القدم المحمدي) ..والمسرح هو مكان السرح ودار الخياله والوسيله للتوضيحية لكل تاملات السوداني .. الذين ما اجتمعو لصناعة ذلك الفن الا وكانت مثل وقيم الزول حاضرة ففي نهاية القصة لازم ينهزم الخاين .
او كما اشتهر اخيرا عن دراما تاسس للعشق المننوع والخيانه..
لكن صناع الدراما السودانيه من جيل قبل حكم البشير السودان حيث كان الحديث اعلاه هو ديدن شغلهم .. ومرت سنون الانقاذ وظفرت انيابها في خاصرة الزول واسرته حتي اخرجت جيلا يفارق كل هذا في لبسه و تشكله و تفكيره .. لذلك وجب علينا بعد حرب الخرطوم ان نعيد الزول الي مرتكزه الفكري الاول.
waleed.drama1@gmail.com
المصدر: سودانايل
إقرأ أيضاً:
السرقة مباحة أثناء خسوف القمر!!
افتتح القاضي المحكمة الشعبية: لا بأس، نبدأ. وأشار للحاجب لينادي على القضية الاولى.
نادى عبد العاطي على الشاكي الأول حسن الاعور، الذي أعلن دون مقدمات ودون أن ينتظر القاضي ليسأله عن مشكلته: الحنين سرق مني ربطة قصب!
مسح القاضي وجهه الضخم من العرق بمنديل أبيض ضخم ولوّح به كأنه يرفع راية استسلام أمام القيظ: ربطة واحدة فقط؟
دة العرفناه يا مولانا، يمكن سرق قبل كدة، ويمكن يسرق تاني. لكن الناس شافوه يوم خسوف القمر. الاولاد في الشارع شافوه منتظر أول الدنيا أظلمت بعد الخسوف والناس انشغلت بدق الصفائح عشان يساعدوا القمر يمرق بسرعة. واحد من الاولاد شافه بالصدفة وهو بيسرق ربطة قصب من سقف بيتي!
قال القاضي: لكن ربطة دي حاجة رخيصة، والزول دة لو ما محتاج ما كان حيسرق القصب. ممكن تعافيه المرة دي وأنا بجاملك في القضية الجاية!
تجاملني في شنو يا مولانا محكمة دي ولا سوق السبت؟ الزول دة متعود دائما يسرق القصب. في الصيف قلت ليه تعال أزرع معاي شوية مريق على الاقل تستفيد بالقصب للبهائم لكن رفض، قال لي الصيف ما للشغل، للراحة، كفاية علينا التعب في الشتاء!
قال شيخ النور مساعد القاضي: اعتبرها زكاة! بعدين ما دام الراجل دة ما بيسرقك الا وقت خسوف القمر ما مشكلة لأن الخسوف بيحصل مرة كل عدة سنين!
قال حسن الاعور: الزكاة دفعناها. ناس الزكاة بقوا ينتظروا المحصول قبل نجمعوا في الجوالات ويقسموا حقهم! وكت احتجت في الصيف ولدي مرض ومحتاج عملية زايدة مشيت ليهم قالوا ما عندهم، القروش مشت كلها للعاملين عليها!
قال القاضي: كدة خلينا يا زول من شغل السياسة دة، انت داير تقطع عيشنا ولا شنو!
واصل حسن الاعور: بعدين لو هو التزم يسرق القصب فقط وقت يكون في خسوف ما عندي مانع، لكن الضمان شنو يكون بيسرق في ايام الظلام وكت القمر يغيب بدري؟
قال القاضي مبتسما: ما مشكلة نحن ممكن نخليه يتعهد قدام الناس ديل ما يسرق القصب الا وقت خسوف القمر!
أشار القاضي لعبد العاطي فنادي بصوته: المتهم الحنين.
جاء الحنين، كان يبدو مسكينا وضعيفا لا يقوى ولا حتى على رفع عود قصب واحد من الارض. حتى الجلباب الممزق الاطراف الذي يرتديه كان يبدو كأنه يسير وحده ولا يوجد إنسان في داخله
قال القاضي: اها يا الحنين. انت سرقت القصب؟
قال الحنين ببساطة وكأنه يرد على السلام: نعم!
شعر شيخ الطيب بخيبة أمل من سرعة الاعتراف الذي كان يأمل في انتزاعه بعد استدعاء الشهود وبعد عدة اسئلة ومداولات.
كانت لديه عدة اسئلة حول مكان وجوده لحظة ارتكاب السرقة، لم يعد لها معنى. فكر قليلا وسأل سؤالا غير ذكي: وسرقت ليه!
صمت الحنين وقال: والله قسمة ربنا بس!
ضحك شيخ النور وقال: دي ما قسمة ربنا، براك قسمت لي نفسك!
قال شيخ الطيب بلهجة تحقيقية ليعوض عن الاعتراف السريع: لازم يكون في سبب قوي. عشان الرجل دة مقدم شكوى ضدك!
قال الحنين: يعني القسمة ما سبب قوي؟
تحير القاضي قليلا، حاول أن يلقي محاضرة يستعين فيها بإرثه من دراسة الفقه، لكنه اكتشف أنه لا يذكر شيئا من الأحاديث التي يمكنه أن يفند بها دعاوي الحنين لتأصيل سرقة القصب. سحب كرسيه للخلف قليلا وأعطى المتهم عدة خيارات ليسهل له الاجابة بعيدا عن إلقاء تبعة ما اقترفته يداه على القسمة والنصيب:
لا إنت وكت مشيت تسرق القصب كنت محتاج مثلا، البقرة جيعانة؟ داير تعمل راكوبة في البيت؟ كنت مستلف قصب من زول جة ضايقك عاوز ترجعها ليه؟ زوجتك قالت ليك جيب قصب عشان نولع بيه النار لعمل العشاء؟ وبعدين ليه اخترت وكت الخسوف للسرقة؟
بدا الحنين مترددا كأن خيارات القاضي لم تنطبق كلها على سرقته. حاول التمسك بمسألة القسمة حتى لا يتهم بتغيير أقواله، فكر قليلا ثم قال: والله القسمة ودتني مراح البهائم مع أن دائما الاولاد بيعشوا البهائم ويحلبوا البقرة، يوم الخسوف كنت ماشي أسهر مع رضوان في الحلة بحري، رضوان قال لي سكر يوم الخسوف ما بينفع، بننسخط لو سكرنا، قلت ليه ننسخط اكتر من كدة حنبقى شنو؟ عشان كدة اضطريت رجعت البيت بدري! لقيت البقرة جيعانة، ما قدرت أحلبها، بعدين الاولاد الصغار كانوا جعانين، الكبار مشوا إتعشوا في كرامة الخسوف في المسيد. مشيت اسرق قصب من جنينة العمدة، هناك القصب كتير مافي زول حيعرف ان في ربطة اتسرقت، لكن لقيت المحل ملان بالاولاد جايين عشان الخسوف. كل محلات القصب لقيتها ملانة بالشفع. جيت ماري جنب بيت حسن الاعور لقيت الاولاد قاعدين في الشارع قدام البيت منتظرين الخسوف. قررت خلاص ارجع أو امشي الحواشات أحاول القى شوية قش رغم ان اليومين ديل مافي حاجة، ناس الرعي ما خلوا حاجة في الحواشات. في اللحظة دي القمر غاب والدنيا بقت ظلام. إنتهزت الفرصة قلت مافي زول حيشوفني.
لكن الكلام دة حرام! قال القاضي.
قال الحنين: حرام شنو، في زول من حكومة الكيزان ديل قالوا سرق بلد كاملة باعها بناسها وبهائمها! بقت على ربطة القصب بتاعتي دي!
تجاهل القاضي كلامه حول السرقة الحكومية وقال: كان ممكن تستأذن الزول دة وتستلف منه القصب!
قال الحنين: استأذنت منه كتير. آخر مرة قبل أيام قال لي ما عندي قصب، العندي ما حيكفيني لغاية نهاية الموسم!
وقف حسن الأعور وقال:
الزول دة يا مولانا لازم يتسجن ويدفع لي تعويض، الزول دة قبل كدة سارق مني حمار!
قال القاضي: الشهود اثبتوا الزول دة كان مريض وعنده ملاريا وكت حمارك اتسرق. ودي بلد مفتوحة تجار حمير مارين ممكن يسوقوا حمارك وسطهم بدون زول يلاحظ وانت حمارك مطلوق اليوم كله، الناس كلها تشتكي ان حمارك كان بيتلف الزراعة عشان كدة الناس فرحت وكت حمارك اتسرق!
أنت فرحان يا مولانا عشان حماري اتسرق؟ انت مفروض رجل قانون ترجع المسروق مش تفرح وكت الناس تسرق!
قال القاضي: أنا ما فرحت، قلت ليك بعض الناس فرحوا لأن حمارك كان معذبهم، أكل برسيم الناس ودخل الحواشات أتلف الزراعة!
لم يفند حسن الأعور إتهام حماره المسروق بإتلاف المزروعات، أصر على إتهام الحنين:
الزول دة سكر بحماري!
قال القاضي: كيف الزول يسكر بالحمار؟ قصدك ركب الحمار مشى سكر بيه؟
لأ سرق الحمار وباعه ومشى اشترى بالقروش العرقي !!
قال شيخ النور: لو عندك شهود جيبهم الزول دة سكر بحمارك او دة حنعتبره قذف!!
قذف شنو انا عمري ما جدعت الحجر. بالعكس زمان وكت كنت فنان بغني في الاعراس الناس جدعوني بالحجارة، في الاول كنت بصبر عليهم وبرد عليهم بالغناء، لكن وكت الضرب كتر بقيت أردم الحجر جنبي قبل ما أبدأ الغناء، ولو أي واحد رماني بحجر بضربه أنا كمان بالحجر وما بوقف الغنا. بكون بغني واضرب والزول يكون جاري من ضرب الحجر وبيرقص من الغنا في نفس الوقت!!
قذف يعني اتهمت الزول بالكضب
كضب كيف الزول اعترف قدامكم!
اعترف بالقصب ما بالعرقي
ما خلاص زول معترف بالسرقة غالبه شنو يجيب العرقي يسكر بيه!
بادره القاضي: وإنت عرفت كيف انه باع الحمار وسكر بقروشه؟
تردد حسن الأعور قليلا، وتلفت حواليه كأنه يحصي عدد من سيشهدون فضيحة اعترافه قبل أن يعلن: ست العرقي قالت لي!
قال القاضي: والوداك محل العرقي شنو؟
ما مشيت أي محل يا مولانا، ست العرقي دي الا امشي اشتري منها، يمكن قابلتها في السوق!
وست العرقي القابلتها في السوق دي، شافت الزول دة وهو بيبيع الحمار ويجي يشتري العرقي!
لأ لكن وكت اشترى العرقي طلّع من جيبه قروش كتيرة دفع منها تمن العرقي، ست العرقي قالت ليه: بعت التمر؟
قال ليها لأ، دي قروش حرام عشان كدة بدفع منها تمن العرقي عشان يذهب الحرام من حيث أتى!
ضحك شيخ النور وقال: وأي قروش حرام معناها قروش حمارك؟
قال القاضي مصرا: وانت الوداك لست العرقي شنو؟ معقول حتحكي ليك الكلام دة كله في السوق؟
فرغ صبر حسن الأعور: مشيت سكرت يا مولانا. ولو أنا ما سكرت يا مولانا انت حتشتغل شنو؟ عندك شهود ناديهم وأجلدني!
حكمت المحكمة بالحبس ثلاثة ايام على حسن الأعور لإهانته المحكمة الموقرة. وبغرامة عشرة جنيهات على الحنين لسرقته ربطة قصب على أن يعوض الشاكي بمبلغ خمسة جنيهات.
قال الحنين: عشرة جنيه عشان ربطة قصب، دة حكم جائر يا مولانا!
مسح مولانا العرق الغزير من وجهه ولوّح بمنديله الابيض الضخم مستسلما للقيظ، وقال: دي قسمة يا الحنين، ليه سرقتك تبقى قسمة وحكمنا يبقى جائر؟
رفعت الجلسة.
2018
أحمد الملك
ortoot@gmail.com
حكام الإمارات يعزون خادم الحرمين في وفاة الأميرة نورة بنت بندر بن محمد