المتهم بقتل زوجته في النزهة: خلصت عليها ونزلت لعبت طاولة

حصل «الأسبوع» على الأقوال الكاملة للمتهم بقتل زوجته في منطقة النزهة، في القضية التي تحمل رقم رقم 1071 لسنة 2022 كلي شرق القاهرة، والصادر بها حكم، بالإعدام شنقا للمتهم و المشدد 3 سنوات وغرامة 10 آلاف جنيه بتهمة تعاطي المواد المخدرة.

قتل زوجته في النزهة

وخلال التحقيق قال المتهم « أنا عندي اكتئاب من 8 شهور، وكنت بروح لدكتور نفسي باخد دوا مرتين في اليوم، و من حوالي 3 شهور توقفت عن تناول دواء الاكتئاب، وكنت بشرب حشيش، وكان في بين وبين مراتي مشاكل لأنها كانت بتشك فيا بسبب إني كان في ستات بيكلموني، وكمان كنت بشك فيها علشان لقيت رقم بيتصل بيها بالليل فأنا شكيت إنها تكون تعرف رجالة عليّا بس مكنتش متأكد، وهي في مرة طلبت الطلاق، وأنا طلقتها وبعد كده رجعتها بحوالي عشرين يوم وكانت عاملة فيا محضر ولما رجعتها راحت اتنازلت عنه».

وأضاف المتهم: «يوم الواقعة حصلت مشكلة كبيرة وبعد ما صالحتها كلمتني وقالتلي إنها بتلم هدومها وهتروح لأختها، طلعت عشان أهدّيها وأمنعها ومتمشيش فشدينا مع بعض في الكلام وأنا اتعصبت لقيت نفسي بجيب المطواة من الدولاب وروحت داخل عليها المطبخ وفضلت أخبط فيها لحد ما وقعت على الأرض جبت سكينة مطبخ وروحت جرحتها من رقبتها وبعد كده دخلت غیرت هدومي وسبتها على السرير عشان كان عليها دم ونزلت قعدت في الكافيه، وضربتها كذا طعنة في منطقة الصدر والبطن».

وأكمل المتهم: «مكنتش حاسس بنفسي وأنا بعمل كده وكانت المسافة بينا تقريبا أقل من متر كان وشنا في وش بعض لما مسكت مطواة قرن غزال كنت شايلها في دولاب اوضة النوم، وندمت لأنها كانت جدعة، ولما ماتت انا نزلت قعدت في الكافيه لعبت طاولة وبعدها بشوية لقيت أخوها بيقولي إنه بيتصل بيها ومش بترد وطلع خبط عليها ومش بتفتح وقلتله إني أنا سايبها فوق نايمة طب خد المفتاح واطلعلها عشان في ناس جيالي الكافيه».

كانت قد قضت محكمة جنايات شمال القاهرة، بالإعدام شنقا على صاحب كافيه متهم بقتل زوجته طعنًا بالسكين داخل شقتهما بسبب خلافات أسرية في النزهة، وذلك بعد أن تم إحالة اوراقه إلى فضيلة مفتي الديار المصريه، وتم أخذ الرأي الشرعي فيه والذى قضى بعقوبة الإعدام.

البداية بتلقي بلاغًا من الأهالي بالعثور على جثة سيدة مقتولة داخل شقتها في النزهة، وانتقل رجال المباحث لمكان الواقعة، وبالفحص، تبين العثور على جثة سيدة بها عدة طعنات متفرقة بجسدها داخل شقتها، وتم نقل الجثة إلى المشرحة تحت تصرف النيابة العامة، وبإجراء التحريات تبين أن زوجها قام بقتلها والقت الأجهزة الأمنية بمديرية أمن القاهرة القبض علي المتهم وبمواجهته اعترف بارتكاب الواقعة وتحرر المحضر اللازم بالواقعة.

ضبط 12 ألف نسخة لملازم وأغلفة تعليمية بدون تصريح في القاهرة

الاحتلال الإسرائيلي يعتقل 17 فلسطينيا من الضفة الغربية

المصدر: الأسبوع