نجاة تامر يحيى مدير أعمال تامر حسني من حادث سير مروع بطريق العلمين

نجا تامر يحيي، مدير أعمال النجم تامر حسني من الموت في حادث سير مروع، أدى إلى تحطم سيارته بالكامل وخصوصًا من الجزأ الأمامي.

 

ونشر تامر يحيى،عبر حسابه الشخصي على الفيس بوك، تفاصيل الحادث الذي أدى لخسائر فادحة به وبالسائق وبالسيارة، حيث كتب،:"مافيش كلام ينفع يتقال غير الحمد لله وبشكرك يا رب علي كل حال وفي كل حال ومن اجل كل حال وعلي كل تجربه صعبه انت بتحطني فيها علشان تفكرني دائما بوجودك في حياتي وبتكون رساله سواء انت بتحبني وبتفديني من حاجه اكبر كان ممكن تحصل ليا أو لحد غالي عندي أو بتكون عايز تفكرني انا فيه خطأ في حياتي محتاج انتبه ليه واصلحه والحمد لله انا عندي ايمان شديد بتجارب ربنا ونعمه الكبيره في حياتي".

 

 

وأضاف،:" أنا ومحمد السواق الجميل اللي معايا ربنا نجانا من الموت امبارح في حادثه من اكبر الحوادث اللي عملتها  في حياتي.

و احنا راجعين امبارح من العلمين الساعه ١.٣٠ ظهرا فجأه ظهرت عربيه نقل قدامه واقفه في نص طريق وادي النطرون في الحاره الثالثة وهو كان قبلها بثواني بيحاول يشغل حاجه في الشاشه اللي قدامه فمكانش في كامل تركيزه علي الطريق وما قدرش يتفاداها،العربيه هربت من موقع الحادث بسرعه علشان عارف طبعا إنه غلطان وانا ومحمد ما قدرناش ننزل من العربيه غير بعد تقريبا ربع ساعه علشان الدم كان مغرق العربيه والمشكله اللي عقلي مش قادر يستوعبها إنه ازاي مافيش ولا air bag فتحت ؟ انا مش هقدر اعدي الموضوع ده من غير ما الاقي اجابه فنيه ليه لاني لو عرفت إنه ده خطا فني في اللي برمج السوفت وير أو ركب السينسورز انا مش هسيبه الا لما اسجنه لإنه كان حياتي هتنتهي أو اعيش بتشوهات في وشي طول عمري بسبب عدم فتح اي air bag".

 

و استكمل بـ،:"أنا حصلي نزيف جامد بسبب كسر في مناخيري وقطع اخذ ٨ غرز وقطع داخل الفم اخذ ٣ غرز وشرخ في الساق وغاليا هعمل عمليه في مناخيري بعد ٥ ايام،محمد السائق الحمد لله كان حاطط حزام الامان فربنا انقذه وكل اللي فيه مجموعه كدمات،النقل هرب من موقع الحادث وانا طلبت النجده والاسعاف ١٧ مره لكن للاسف كل مره يردوا طالبين مني تحديد موقعي أو اي علامه مميزه في الصحراء وفي طريق صحراوي ودي يعني خليتني اتعصب عليهم لكن مافيش اي حاجه نفعت معاهم، طلبت من كل اللي كلموني من النجده إنه حد يبعتلي اي رقم تليفون ابعتله عليه لوكيشن واني بنزف نزيف جامد ومحتاج اسعاف فورا لكن كان الرد في كل مره لا يا فندم ده مش اوبشن عندنا وقعدت ساعه ونص تقريبا دون مساعده، ساعه ونصف وانا بنزف في طريق دولي عدي عليا نحو اكتر من ٥٠٠ عربيه لكن للاسف ولا عربيه فكرت تقف تشوف فيه ايه وغاليا من بشاعه منظر عربيتي الناس افتكرت اني اللي جواها اكيد ماتو لإنه طبيعي لو اي عربيه تانيه مش بقوه Range Rover كان استحاله نحرج منها عايشين، اه على فكره الحادثه كانت الساعه ١.٣٠ الظهر وبعد ما روحت المستشفي في وادي النطرون وبعدها مستشفي زايد التخصصي وبعدها مستشفي الرفيده وخلصت كل حاجه وعدي ٨ ساعات لقيت تليفون من النجده بتاعت طريق العلمين الساعه ٩.٣٠ مساء بيقولي هو حضرتك عملت بلاغ عن حادثه من ساعه في طريق العلمين ؟ طبعا لقيت نفسي بمنتهي الاحترام بضحك وبقفل السكه في وشه.

 

المفروض إنه كان عندي رحله لامريكا النهارده  لكن طبعا مش هقدر اسافر لمده ١٠ ايام ولغيت كل حاجه وكل الحجوزات والطيران والفنادق وكل حاجه وتم تأجيل كل حاجه لكن برضه الحمد لله،العربيه دي من يوم ما اشتريتها وانا شايف حاجات بتحصلي فيها عمري ماشوفتها في ٢٧ سنه شغل وركوب عربيات، الساحل خلص واللي شايف حياتنا علي السوشيال ميديا بس ياريت ييجي يقضي معانا اسبوع بس ويشوف حجم الشغل اللي بنشتغله كل يوم وحجم الضغط النفسي والعصبي اللي احنا عايشين فيه واللي مافيش حد يقدر عليه أو يقدر سيتحمله واني الخروج والسهر والسفر والظهور في المجتمعات والحفلات والسفر الكتير والصور والفيديوهات اللي بتشوفوها وغيره وغيره ده جزء من شغلنا وجزء من حياتنا وجزء صعب قوي قوي قوي وليه ضريبه جامده قوي بندفعها للاسف من وقتنا وفلوسنا وصحتنا واحيانا عائلاتنا علشان دي طبيعه شغلنا للاسف اللي بناكل. 

 

منها عيش مش اكتر، الحمد لله علي كل شئ ويارب ما يوري حد منكم أو حد غالي عليكم اللي انا شوفته النهارده".

واختتم حديثه بـ،:" شكرا لكل اصحابي اللي وقفوا معايا وساعدوني واهتموا انهم ينقلوني افضل مستشفييات علشان اخد احسن رعايه وغرز تجميل واتطمن على نفسي.  

 

شكرا هاني هانز وضياء سليمان ودكتور محمود السيد ودكتور احمد نجم وكل تيم مستشفي الرفيده علي كل حاجه. 

شكرا اخواتي تامر حسني وحسام حسني ورومير علي الاهتمام ومتابعه حالتي طول اليوم.

 

شكرا عماد نبيل بجد انت اخ حقيقي علي كل اللي عملته معايا النهارده وخلي بالك من العربيه بقي لحد ما تروح لحال سبيلها أو نبيعها خرده علشان انا مش هركبها تاني وربنا يعوض عليا ويبعد عننا كلنا العين الشريره.

 

تاني انا كويس الحمد لله بس معلش انا تليفوني قافله كام يوم محتاج فيهم راحه وهدوء".

المصدر: بوابة الفجر