محمد الحلو: "أغنيتي للمملكة السعودية هدية مني.. وإن أبو ناصر يكلمني على المسرح شرف كبير"

حرص الفنان محمد الحلو على توجيه الشكر لجمهور السعودية، مُعبرًا عن سعادته بإحياءه حفله هناك، وأبدى إعجابه بالتنظيم، وذلك من خلال المؤتمر الصحفي الذي أقيم لحفل ليلة الطرب الأصيل.

وقال محمد الحلو:" بصراحة قولت ممكن يتعاد الحفل في موسم الرياض إنما فوجئت على السوشيال ميديا بصفحة الوزير وقال إننا مكتفناش بصوته ونعمله حفلة يوم 1 سبتمبر، استغرب والله وقولت ممكن بقى عايز يهديني ويحيني".

 

محمد حلو: تنظيم هائل من أول ما بننزل من الطيارة 

وأضاف: عاوز أقول صراحة من أول ما نزلت من الطيارة وبياخدونا على العربيات وبعدين بنمشي، مش بنمسك شنطة وفيه تنظيم هايل زائد لما الناس قابلوني كانوا مفاجأة ولما غنيت ليالي الحلمية لقيت صريخ، بقى قلبي فرحان، زائد الكرم الكبير اللي أنا شوفته فأنا ماشي من هنا في دماغي هقدم إيه؟ فقولت مفيش غير صوتي أقدم بيه غنوة يبقى هدية من هدايا اللي ادوهاني الجمهور والمملكة.

 

وتابع محمد الحلو: كلمت مصطفى كامل ومصطفى بيفهم في الحاجات دي وهو شاف الحفلة وعملي الكلام ولحنه وادينا الأغنية للموزع أمير عبد المجيد هو كان عنده شغل ولكن أنا حبيب عمره ودي السعودية وهو كمان سعودي مصري، فعملناها وطلعت بالشكل ده الحمد لله، بعد ما اتناقشنا في شوية تفاصيل ومعظم الأغنية طلعت من أول مرة.

وأردف محمد الحلو: لا أنا متفاجئتش أنا اتخضيت، مكنتش متوقع كده أبدًا ودي أول مرة تحصل، مبقيتش عارف اعمل إيه وباصص لأمير مش عارف هو كمان يعمل إيه وكان شرف كبير جدًا على رأسي إنه يكلمني على المسرح أبو ناصر قدام العالم العربي وهو وزير، أنا آه كبير في السن إنما ده شرف أكبر مني.

ما هي أعمال محمد الحلو القادمة ؟

 

وكشف أعماله القادمة، قائلًا: لسه بقى وأنا هسكت، مش هسكت هيبقى فيه حاجة حلوة وعلى قد حبي لأبو ناصر ولشعب المملكة، وبقولهم في يومهم الوطني كل سنة وأنتم طيبين وأنتم في أجمل عصر للمملكة وخلو بالكو وحافظوا على اللي انتو فيه؛ لأن انتو بتطلعوا وحافظوا على بلدكم وإن شاء الله هتبقى دولة من الدول الكبرى في العالم بإذن الله وبإذن الله معاكو مصر.

تفاصيل حفل محمد الحلو في جدة بعنوان "الطرب الأصيل"

 

وأحيا الفنان محمد الحلو حفل غنائي ضخم أمس الجمعة، على مسرح بنش مارك بجدة، رفقة المطربات ريهام عبد الحكيم، إيمان عبد الغني، وهايدي موسى،  في جدة بالمملكة العربية السعودية.

 

وقدم محمد الحلو في حفله اليوم بجدة أغنية لشعب السعودية من ألحان مصطفى كامل وتوزيع أمير عبد المجيد.

 

وتقول كلمات الأغنية التي غناها محمد الحلو للسعودية: هنا في نفس المكان حجيت وعملت عمرة ودار بيا الزمان وسمعت كلام في بلدي واتقال لي واتحكى.. واللي أنا شفته بعنيا جواكي يا سعودية فاق الأحلام شوية.. مبروك من كل قلبي يا شعب المملكة.. الله يديم الأفراح عليكي يا سعودية أنا مصري وابن مصر وابن الأمة العربية.. مبروك على كل حلم يا شعب أصيل وحلو.. أنا محمد الحلو جاي بقدم تحية.. حاسس إني في بلدي متسلطن أوي ومرتاح.. شكرا على الحب اللي أنا شايفه شكرا على التقدير والترحاب والشعب اللي بحبه اللي غمرني وفكرني بريحة الأحباب.

المصدر: بوابة الفجر