طريقة تغيير تطبيق بنكك من هاتف الي اخر بعد اجابة اسئلة الامان

السلام عليكم
بالنسبة لي تغيير تطبيق بنكك من هاتف الي اخر بعد اجابة اسئلة الامان
حاليا
١-الكود او الرمز بجيك في رقم الشريحة المسجلة في البنك فقط وبعض الشبكات
٢- ما بجيك في الايميل يعني لو معتمد على الايميل ما بجيك
الكلام دا الان ليو اكتر من شهر
ايضا بالنسبة لي كلمة السر لو نسيتا وجاوبت على اسئلة الامان ما بتقدر تعمل كلمة سر جديدة
الحل :
١- في حالة تغيير التطبيق من هاتف الي اخر
الاتصال بي خدمة مباشر بنك الخرطوم او يكون عندك الشريحة بس ✅
حتى لو كنت برة السودان اتصل بي خدمة مباشر من رقمك العالمي ما شرطا رقمك المسجل لو رقمك المسجل شغال تجوال بتجيك رسالة ال OTP لي بعض الشبكات برضو
الاسئلة الشائعة :
❇️عملت حساب اونلاين جاني رقم الحساب ما جاني كلمة السر
الحل تنتظر لمن تجيك كلمة السر
تتصل بي خدمة مباشر تطلب كلمة سر جديدة
❇️حولت غلط اعمل شنو ؟او ارجعا كيف ؟
بتعمل خيار تحويل خاطئ من الاشعار الابيض ف فترة ٢٤ ساعة فقط من بعد التحويل الخطا
لو الزول وافق يرجعا برجعا (هو ما مجبر يرجعا) الرسوم ٥ الف ج لو رجعت
ما رجعت بتمشي النيابة تفتح بلاغك وتتابع من هناك (ماف جهة غير النيابة والقضاء بترجعا ليك)
❇️منطقتنا مافيها فرع؟
تمشي منطقة فيها فرع
ما بقدر الحركة صعبة ؟
ما عندك حل الا مباشر
ما عندنا شبكة اتصال؟
ماف حل
❇️جاتني رسالة ف الواتس او بتعرف منصة ….

.(اسما كتيرة للمنصات) كيف اعرفا صادقة ؟
جاوب على دا
قالت ليك المنصة اودع مبلغ بالكربتو ؟
قالت ليك ف مهمات تعملا ؟
قال ليك اودع مبلغ واسحب اكتر منو ؟
منصة زوووط ابعد منها
❇️منصة موقع تطبيق زول اخوي ود حبوبتي قال لي ف منصة بتسحب وحلف وف ناس سحبو ليهم لو زي الفوق ؟
زووووط برضو ابعد منها
❇️ منصة او موقع او رسالة واتس او زول رسل لي قال لي اشتغل معاو استلم ليو بنكك في حسابك وبديني حقي وما عارف انت مصدر القروش دي وين ؟
دا زوووط كبير وغسيل اموال ابعد منو
❇️حسابي حق بنكك ما بقدر احول منو ولا بقدر استقبل فيو ؟
تمشي الفرع تشوف فيو بلاغ والنيابة وين
❇️قالو لي فيو بلاغ اي وعرفت النيابة ؟
طوالي تصل النيابة ماف جهة ح تقدم معلومات غير النيابة بس
❇️ فتحت حسابك بنك وم رسلو لي الرقم وكلمة السر وخاتني في الانتظار ولما احاول اسجل من جديد التطبيق بقول لي مسجل مسبقا
الحل قلناو قبيل تنتظر بس
❇️ عندي حساب اختي في بنكك قفل منعا وتلفونها سرقو
م تقدر تساعدني وافتحو عندي صوره جوازها وآخر ارقام حولت ليهم
ما بقدر اساعدك ولا ف زول بقدر يساعدك الا خدمة مباشر واختك التتصل
❇️ نرجو التكرم بتوضيح طريقة التحويل من اوكاش لبنكك
ابحث في الفيس عن صفحة اي بنك بتلقا شارحين كيف التحويل اليهم او لي غيرهم
❇️ عايز استثمر في العمله الرقميه
اديني طريق واضح شديد
انا موجود في السودان وعايز استثمر وبثق فيك؟
ماف طريق واضح الا تتعلم براك وتخسر وتربح وتخسر وتربح
❇️ فتحت حساب جديد اونلاين في اوكاش..
رقم الحساب جاني كلمة السر ماجاتني؟
راسل ناس اوكاش ف الواتس حقهم بتلقا الرقم ف صفحتهم الصفحة اسمها بنك امدرمان الوطني وموثقة يعني فيها ✔️ علامة صح
Abdulrashid Liela

#تايلندي_اسمر
#معلومة_من_تايلندي_اسمر

إنضم لقناة النيلين على واتساب

المصدر: موقع النيلين