من هو أحمد قجة ????

من هو أحمد قجة ????
كتب مهادن الزعيم
???? بما ان قرى الجموعية بتتعرض لهجوم كبير من قوات قجة ف تعالو نعرف قجة دا منو وعمل شنو … لحدي قبل اتفاق جوبا للسلام الموقع مع الحركات المسلحة في اكتوبر 2020 كان احمد قجة مواطن عادي يسكن جنوب الحزام لكنه سافر دارفور قبل الاتفاق بشهور وهناك انضم لحركة تمازج ليعود للخرطوم في العام 2021 وهو برتبة عقيد تمازج (فجأة بدون مقدمات) وكمان عنده حراس.

شخصية ….
???? بعد إنقلاب 25 اكتوبر 2021 القاموا بيهو الجيش والدعامة والحركات المسلحة على الحكومة الانتقالية بقيادة حمدوك حصلت ازمة بسبب انو ضابط شرطة من مكافحة سرقة السيارات قبض واحد من قادة تمازج راكب عربية مسروقة وهنا طوالي اتحرك احمد قجة بقواته وسط الخرطوم وحاصر القسم الشمالي بالخرطوم يريد اطلاق سراح منسوبي حركته بالقوة ولكن تصدى له ضباط صغار من القسم ورفضو ذلك وكاد ان يحصل اشتباك لولا تدخل قيادات من الجيش والشرطة واطلقوا سراح حرامية حركة تمازج عشان م يحصل إنفلات امني …
???? الغريبة انو قيادات تمازج بما فيهم قجة م اكتفوا بذلك بل طالبوا بتجريد الضابط الاتصدى ليهم من رتبته ومحاكمته عسكريا وهنا تضامن جل منسوبي الشرطة مع زميلهم لدرجة انو مدير الشرطة مشي ليهم واتحدث مع قواته في حوش الشرطة المجاور لجامعة النيلين حتى رجعوا الشغل …
???? بعد قيام حرب 15 ابريل انقسمت تمازج كعادة كل الحركات المسلحة وانضم جزء منها الى الجيش وانضم الجزء التاني بقيادة قجة للدعم السريع …
???? بعد انضمام قجة للدعم السريع جمعوا ليهو جزء كبير من جيش ام باغة (جيش بتاع نهابين وقطاع طرق في دارفور بعتمدو على الموتر والسلاح فقط) جمعوهم تحت قيادة قجة وفكوهم في الجزيرة وطبعا دخلوها عن طريق الكلاكلة جبل اولياء واستولو على منطقة ابقوتة التابعة لمحلية الحصاحيصا قبل سقوط مدني بشهر كامل ….
???? لمن الد٫عم السريع هاجم مدني من اتجاه الشرق عن طريق البترول بتاريخ الجمعة 15 ديسمبر 2023 ودارت معارك طاحنة مع الجيش في حنتوب شرق الكبري حاول قجة الالتفاف بقواته من اتجاه الغرب من ابقوتة عن طريق كنار الحصاحيصا الى مدني وفعلا نجح في دخولها بتاريخ الاثنين 18 ديسمبر 2023 …
???? بعد سقوط مدني في يد الدعم السريع تم تنصيب (كيكل( كقائد لقوات المليشيا في الجزيرة وعلى اثر ذلك تم توزيع الجزيرة بين قادة المليشيا (ذي كيمان المرارة في المناسبة) واصبح كيكل هو القاىد العام والطاهر جاه الله مسؤول من شرق الجزيرة وعبدالله حسين مسؤول من منطقة المدينة عرب وحسن الترابي مسؤول من محلية الكاملين وانطلق البيشي بقواته الي جنوب الجزيرة وكان نصيب محلية الحصاحيصا هو الاسواء على الاطلاق حيث اسندت الى احمد قجة ….
???? قجة اتخذ من مصنع النسيج بالحصاحيصا كقاعدة له وانتشرت قواته تعيث في الارض فسادا دون حسيب او رقيب (وطبعا كل م بقتحمو قرية بلمو الناس كلهم في مكان واحد وبعرفو روحهم بطريقة غريبة تدعو للسخرية مثل (نحن تبع القائد قجة وجينا نشيل عرباتكم ودهبكم عشان نحارب بيها الجيش وممكن نكتب ليكم ورقة بذلك عشان بعد ننتصر ونغير الدستور نرجع ليكم حقكم) مع انو البلد اصلا ماشة امفكو ومافيها دستور منذ ان انقلب العسكر على الوثيقة الدستورية ….
???? التعريف يبدو غريبا للوهلة الاولى ولكنه في حقيقته يراد به ان يرمي بكل الجرائم (لاحقا) على عاتق قجة (لو في يوم قرر الدعم السريع يتخلص من قجة حايقول كل الحصل في في محلية الحصاحيصا من عمايل قجة وناسو فقط ونحن م عندنا بيهو علاقة ذاتو) …
???? طبعا قوات قجة خليط من عدد من القبائل مافي رابط بينها (يمكن كل مجموعة منهم عندها قائد مربوط مع قجة مباشر وحدد ليهو منطقة ينهبوها هو وقواته دون التعدي على مناطق قادة المجاميع الاخرى) وطبعا ممكن يشتبكو مع المجموعات الاخرى بكل سهولة مع انهم كلهم تابعين لقجة … في مرة جات مجموعة من اتجاه قرية فطيس واقتحمت قريتنا ونهبت كمية من الابقار فطاردهم مجموعة اخرى من الدعامة التابعين لقجة وموزعين في منطقة الذاكرين وقتلوا واحد منهم بحجة انو دي حاكورتنا ومافي زول ينهبا غيرنا وفعلا رجعو الابقار وشالوها هم ….
???? قوات قجة بتقاتل عشان الغنيمة فقط وكانو مسؤولين عن محور المناقل والحمد لله فشلو في اسقاطها (حتى انه في يوم تحرير مدني حاول قجة الالتفاف بقواته على متحرك المناقل الغربي ومهاجمته عن طريق كنار كبري 18 ولكنه فشل) وهم المسؤولين عن مجزرة ود النورة ومجزرة ام عضام في رمضان الفات ومجزرة ود البليلة في فبراير 2024 ومجزرة ام مليحة الاولى والتانية دا غير انو قواته سرقت كل المحاصيل الزراعية واستخدمت شوالات الذرة والقمح في ردم الترع عشان يقدرو يطلعو العربات النهبوها …
???? في الفترة من سقوط مدني لحدي شهر اكتوبر 2024 كانت منطقة محلية الحصاحيصا هي الاسوا في الجزيرة من حيث كمية الانتهاكات والقتل والمجازر والتهجير حتى اصبحت بعض المناطق التي تضم اكثر من 20 قرية خالية تماما وتم تهجير كل سكانها برعاية قجة طبعا ….
???? بعد تحرير مدني في يناير 2025 بدا قجة بسحب قواته من محلية الحصاحيصا في فبراير لكنه اجتاح القرى الواقعة شمال الجزيرة والمتاخمة لولاية الخرطوم وارتكب فيها مجازر استمرت حتى بعد منتصف مارس الحالي 2025 ….
???? بعد انسحاب الدعامة من ولاية الخرطوم انسحب قجة بقواته من شمال الجزيرة وقطع كبري جبل اولياء وكالعادة عاثت مليشياته فسادا في قرى الجموعية وارتكبت مجازر وقتلت ونهبت وسرقت ومازالت مستمرة في افعالها حتى لحظة كتابة هذا المنشور في 28 مارس 2025 ….
???? كتبنا الكلام دا عشان م بكرة قجة يسلم وتقولو لينا الزول دا كان غواصة وتابعين لينا وزارعنو في نص الجنجنا … قجة هو اكثر قادة الدعم سفكا للدماء وقواته هي المسؤولة عن كل م حصل في محلية الحصاحيصا منذ ديسمبر 2023 لحدي الان
حسبنا الله ونعم الوكيل

مهادن الزعيم

إنضم لقناة النيلين على واتساب

المصدر: موقع النيلين