الملكة ماما

اسمحوا لى التحدث بالعامية فى هذه المقالة

ماما كلمة بسيطة ولكن وراءها معانٍ قيمة وأغلى من الألماس.

فكلمة ماما لها نفس المعنى ونفس اللهجة والنطق فى كل لغات العالم.

ماما يعنى سندك إللى أنجبك وتعب عشانك.

ماما يعنى ضهرك إللى حاميك وحافظ عليك.

ماما يعنى الحضن الحنين إللى بتجرى عليه وانت فى أزمتك بتعيط.

ماما يعنى إللى بتشوف تفضيلاتك إيه فى أكلك وشربك ولبسك وتتعب عشان تجهزهولك عن طيب خاطر وإنت مرتاح من غير ما تشيلك هم.

ماما يعنى مبتشتكيش من أى تعب عشان متشيلكش هم وتشيله هى لوحدها من غير ما تشتكي.

ماما يعنى اللى وصلتك لنجاحك فى دراستك وشغلك وبيتك.

ماما يعنى المعاملة المثالية اللى ملهاش زى، فكل أم فى الدنيا والحياة هى أم مثالية.

تحية لكل أم شهيد وأم من ذوى الهمم وأم لذوى الهمم وأم لأبناء أيتام الأب وأم بديلة.

وتحية لكل أم متوفاه تستحق برها بعد رحيلها لما بذلته من عناء وتضحيات فى حياتها.

وتحية لكل أب قام بدور الأب والأم معا.

وتحية لكل طبيبة وممرضة ومعلمة وأخصائية قامت بدور الأم لمن ترعاهم.

وتحية لكل عمة وخالة وجدة وقريبة قامت بدور الأم لمن تعولهم.

وتحية خاصة جدا لأمى المثالية التى ضحت ومازالت تضحى من أجلنا فالكلام لن يوفيها حقها، كل العام وحضرتك طيبة وبخير يا ماما

وكل عام وكل أم طيبة..

" عيد أم سعيد.".

المصدر: الأسبوع