نشوى مصطفى تبكي زوجها على الهواء: نبيل الأخلاق كان طيب وحنية الدنيا فيه

دخلت الفنانة نشوى مصطفى، في نوبة بكاء على الهواء، خلال برنامج بنت البلد، عبر قناة cbc سفرة، اليوم الجمعة 10 يناير، في أول ظهور لها بعد وفاة زوجها. 

وظهرت نشوى مصطفى، بالأسود حدادًا على زوجها، وقالت خلال الحلقة: «اللهم لا اعتراض وهعترض على ايه أنا كمان رايحة وكل الناس رايحة.. أنا بس الفراق مع الطيبين واجعني.

. أنا كنت بقول ياريته كان إنسان وحش أو أهانني أو ظلمني أو عمل حاجة وحشة لكن كل اللي عمله طيب وكان فعلًا حنية الدنيا فيه .. أنا أبتليت بوفاة والدي لأنه شقي علينا لكن وجود جوزي جنبي سندني وكان بيدعمني». 

نشوى مصطفى ترثى زوجها الراحل 

وكانت الفنانة نشوي مصطفي نشرت عبر صفحتها علي موقع التواصل الإجتماعي الشهير “ فيسبوك ” ، صورة تجمعها بزوجها الراحل ، ونعته بكلمات مؤثرة . 

وقالت نشوي مصطفي : سترتنى ربنا يسترك .. أكرمتنى ربنا يكرمك .. سيبت لى أجمل هدية ولادنا ربنا يهاديك بالفردوس الأعلى .. ٣٣ سنة ستر وكرم ومحبة ومودة ورحمة .. علمتنى إزاي أكون من المتصدقين.. علمتنى إزاي أكون دايماً فى معية الله.. علمتنى إزاي تكون عزة النفس .. علمتنى ازاي أتسامح حتى مع اللي آذانى.. علمتنى إزاي اتوكل على الله فى كل شئونى .. علمتنى إزاي أكرم ضيفى … علمتنى معنى التواضع مع عباد الله الضعفاء .

وتابعت نشوي مصطفي : يانبيل الأخلاق ياابن الأصل العالى .. نسيت تعلمنى إزاي اقدر أعيش من غير وجودك .. ٣٣ سنة مبعدناش عن بعض لحظة .. ٣٣ سنة ذكريات وحياة بحلوها ومرها.. ٣٣ سنة كنت خير زوج وخير أب .. ٣٣ سنة أكرمتنى وسترتنى وجبرت خاطرى وربيت عيالنا أحسن تربية .. ليه ياعماد سيبتنى لوحدى كده - مااستاهلش منك تسيبنى لوحدى ده انا مبعرفش أعمل حاجة فى الدنيا - انتا اللي كنت بتعمل لنا كل حاجة - انتا اللي سندتنى فى كل ظروف حياتى الصعبة —  فى شدتى وفى مرضى شيلتنى وطبطبت عليا -  ياااااه  على غلاوتك ياعشرة عمرى — يااااااه على غلاوتك يا أبويا وأخويا وحبيبى وجوزى وابنى —  باموت ياعماد —  باموت وانتا مش قدام عينى —  حاكمل إزاي يارب من غيره .. ادعو له بالرحمة وادعولى بالصبر وادعو لولادى بالصبر والثبات.

أعمال نشوى مصطفى 

ومن ناحية أخرى تشارك نشوي مصطفي فى بطولة مسلسل “ سيد الناس ” ، والمقرر عرضه خلال شهر رمضان القادم ، ويقوم ببطولته عمرو سعد .

المصدر: صدى البلد