المخرج حسين المنباوي ينعى محسن التوني بكلمات مؤثرة: «صاحب فضل وهفضل فاكرك»

رحل في الساعات الأولى من صباح اليوم، العميد السابق بالمعهد العالي للسينما محسن التوني، بعد صراع طويل مع مرض سرطان الحنجرة، وتم تشييع جثمانه من مسجد السيدة نفسية بعد صلاة ظهر اليوم بحضور عدد كبير من الفنانين في مقدمتهم الفنان أشرف زكي نقيب المهن التمثيلية.

كواليس دعم محسن التوني لـ حسين المنباوي في مجال الإخراج

وكشف المخرج حسين المنباوي عن كواليس أول يوم له في مجال الإخراج، والذي كاد أن يضيع مستقبله لولا دعم محسن التوني له، ومساندته وتعليمه كيفية العمل على أرض الواقع وداخل اللوكيشن.

وكتب «المبناوي» على حسابه الرسمي بموقع التواصل الاجتماعي فيسبوك، قائلاً: «دكتور محسن التوني راجل جميل جدا جدا.. و مؤثر في حياتي حتى وهو مش واخد باله.. وأنا طالب في معهد السينما كنت بدور على شغل وحالتي ساعتها كانت صعبة.. كان نفسي انزل مساعد مخرج تحت التدريب علشان اتعلم.. و كنت حرفيا مبفهمش حاجه ولا عمري نزلت أوردر.. و المفاجئة انه جالي شغل مع مخرج كبير أ\ أحمد المهدي، و كان بالنسبة لي ده فرصة العمر لأنه من أهم مخرجين الإعلانات في مصر، و لكن رغم الفرحة الكبيرة.. إلا إنهم بلغوني إن مساعد المخرج الأول اللي انا كنت مكلمه أصلا و طالب منه اني انزل تدريب معاه مريض، واني أنا هكون المساعد الأول والوحيد مش تدريب».

وتابع قائلاً: «ساعتها احتست وحسيت ان الدنيا اسودت في وشي.. لقيت نفسي بفشل مع أول طلب وقدام الراجل الكبير.. روحت مكلم دكتور محسن الساعة ستة الصبح .. كان تقريبا لسه نايم.. و سألته ايه البانثر ده يا دكتور !! رد بهدوء و قالي بانثر يعني شاريوه يا حسين .. في المعهد بنقول عليه شاريوه بس في السوق اسمه البانثر.. اسأل في الأوردر عندك مين اسطي الكرين وقوله عايزين البانثر.. فهمت وقفلت معاه وروحت عملت كده.. و عدي الـ shot الأولاني على خير».

واختتم حديثه قائلاً : «ومن ساعتها بدأ شغل يجيلي كتير.. وما بطلتش شغل لحد النهارده.. يمكن دكتور محسن ماخدش باله من اليوم ده و ما كبرش الموضوع.. بس الموضوع عندي كبير جدا وفاكر اليوم ده كأنه امبارح.. الله يرحمك يا دكتور ويحسن إليك .. هفضل فاكرك بالخير على طول واتعلمنا منك الإنسانية والسينما مش سينما بس».

موعد ومكان عزاء محسن التوني

ومن المقرر أن يكون موعد ومكان عزاء محسن التوني يوم الاثنين المقبل، بعد صلاة المغرب، بمسجد الشرطة في الشيخ زايد، بحضور عدد كبير من الفنانين وأساتذة أكاديمية الفنون والمعهد العالي للسينما.

المصدر: الوطن