المغنواتي

والليل سفر بلا رجوع

سفر طويل من غير طُرق

مكتوب علي كل النجوع

في الرحلة لازم نفترق

الحلم حَسَن الهيئة مُر الطعم

وكاساته لازم تتشرب 

والواد أبو الصوت الحزين

أول ما يبدي يقول يا ليل

نخل البلد كان ينطرب

ويميل جريدُه يمسح الأوجاع 

عن السهاري المحرومين

الحالمين..

ببكرة جاي بإجابة لسؤال السنين

مين كان سبب في حزن مين؟

والواد جميل

وكان بصوته النيل بيرقص ع الضفاف 

يقدر يبّكي الفجر من موال حزين 

يقدر يفتّح ورد من قلب الجفاف 

والبت كانت حتة من شمس الصباح 

تِسكر الدنيا إذا الجفنين يميلوا 

لكن المغني ف أرضنا

مسكين ما يملكش إلا ليله

نهاره دايماً مستباح

ولأننا

دستور سعادتنا ومنبع ضحكنا 

موقوف بتهديد السلاح

بنخاف إذا مَر الصفا من يَمنا 

ونخاف عينينا تنظر الناس الملاح 

لا ملكنا القوت للسهر

ولا ملكنا توب للمسير يم المتاع 

كل الشوارع مجرى لدمانا الحزينة 

بيضيق علينا الكون

كل ما يزيد إتساع

علشان كده.

.

بنمد إيدنا للعدا

وللجدور المفسدة

تملانا من سم العقول

تسرقنا من غيط الأمل

ترمينا في بير التمني

وعشان كده..

بنخاف إذا غنى المغني

 

محمد المصري، أسوان

المصدر: بوابة الوفد