ميدو :اعتذر عن تسببي في جدل..احترم المنافسين ولكن تشجيعي للزمالك فقط
تاريخ النشر: 9th, December 2024 GMT
حسم أحمد حسام ميدو، نجم الزمالك، الجدل الدائر خلال الأيام القليلة الماضية، منذ إعلانه عدم تشجيع النادي الأهلي في كأس العالم للأندية 2025.
وكتب ميدو عبر منصة "أكس": "انا ابن الزمالك، وأكبر فخر ليا في حياتي إني ابن المدرج، ابن الثالثة يمين، بلعب في الزمالك من وأنا عندي 9 سنين وأنا عيل صغير كنت بروح بفانلة الزمالك في المواصلات علشان الناس كلها تعرف إني ناشئ في الزمالك".
وأضاف: "بطاقتي وأنا عيل صغير هي كارنيه اتحاد الكرة إللي مكتوب عليه اسم الزمالك.. تتلمذت على إيد مدربين عظماء علموني إني أنتمي لفريقي بس وما أشجعش أي نادي ثاني في مصر بالذات إلا نادي الزمالك أيًا كان بيلاعب مين ولكن في نفس الوقت اتربيت إني أحترم كل المنافسين وأهنيهم لو كسبوا وأبارك لهم وأقول لهم هارد لك لو خسروا".
وواصل: "هو ده معنى الروح الرياضية بالنسبة لي!!، لما اتسألت في الاستوديو هتشجع الأهلي في كأس العالم للأندية رديت بطبيعتي دون أي نفاق أو كذب، لأن بكل بساطة مفيش حاجة في الدنيا تستاهل إنك تكون كذاب ومنافق!، اتفق معاكم إن التوقيت ما كانش مناسب، وبعتذر لأي حد زعل إني قلت الكلام ده في حدث مهم يخص النادي الأهلي، وأنا شايف الناس إللي زعلت بخصوص إن الوقت مش مناسب عندهم كل الحق".
وشدد ميدو: "أما لو اتسألت مليون مرة هتشجع أي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت، أما بخصوص الهجوم إللي بتعرض له فأنا عاذر الناس، لأنهم ممكن يكونوا اتعودوا على إجابات مختلفة في السنوات الأخيرة من ناس تصدروا المشهد في الإعلام وهم أكتر ناس بيأذوا المنافس في الخفاء، وأكتر ناس بتتمنى من قلبها خسارة المنافس من جواهم".
واستكمل: "مش هرد على أي حد هاجمني، لأن بكل بساطة أنا في مرحلة في حياتي شايف إن مفيش حاجة في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس، بالنسبة لي ماتتعداش أكتر من كده!!".
واختتم: "مرة ثانية بعتذر إني كنت سبب في جدال قائم الأيام إللي فاتت، للأسف مش ذنبي، ولكن بسبب مدمنين الترند والدخلاء على كرة القدم إللي لا يمكن يفهموا أبدا عقلية مشجع الكورة!!".
المصدر: صدى البلد
كلمات دلالية: الزمالك ميدو الاهلي كاس العالم للاندية المزيد المزيد
إقرأ أيضاً:
ميدو كلمة السر.. خالد الغندور يكشف تفاصيل تفعيل الزمالك بند شراء بنتايج
كشف الإعلامي خالد الغندور، نقلاً عن مصدر داخل نادي الزمالك، أن أحمد حسام ميدو، عضو لجنة التخطيط، لعب دورًا محوريًا في إنهاء صفقة ضم المغربي محمود بنتايج بشكل نهائي من سانت إتيان الفرنسي.
ونجح النادي في تمديد عقد اللاعب حتى عام 2028، بعد الاتفاق على تفعيل بند الشراء في عقده.
وأوضح المصدر أن ميدو استغل علاقته الجيدة مع لويك بيران، المدير الرياضي لسانت إتيان، لإنهاء الصفقة سريعًا، خاصة أن مساعد بيران كان زميله خلال فترة لعبه في وست هام الإنجليزي، وهذه العلاقة سهلت المفاوضات، وساعدت الزمالك في حسم الصفقة قبل تدخل أندية أخرى من داخل مصر وخارجها.
وأوضح المصدر أن الاتفاق مع النادي الفرنسي نص على دفع قيمة الصفقة على قسطين، يبلغ كل منهما 500 ألف دولار، بدلاً من دفع المبلغ دفعة واحدة. كما استضاف ميدو وكيل اللاعب الفرنسي في القاهرة، حيث جرت مفاوضات مكثفة انتهت بتوقيع بنتايج على عقد جديد لمدة ثلاث سنوات.
ويعتبر نجاح ميدو في تسريع الصفقة خطوة أولى ضمن خطة لجنة التخطيط لتجهيز قائمة الزمالك للموسم المقبل. ومن المنتظر أن يحضر اللاعب مباراة القمة القادمة تلبيةً لدعوة النادي.
تفاصيل جديدة في حادث قطار الإسماعيلية.. نجل سائق الميني باص ضمن الضحايا