إبداع|«كان بودى أعيش بخفة من غير قلق».. شعر لـ محمد الكاشف
تاريخ النشر: 21st, November 2024 GMT
تابع أحدث الأخبار عبر تطبيق
بطلت أفكر فين بكرة
وفين بعده
ده حتى القلب من بعده
مافوهشي جديد
ولو هانعيد كلام الحب من تاني
هانبقى بعيد ولو جاني
زمان تاني غير التاني
هانفضل برضو وف بُعده
وبجناني
محلك سر
***
شريط بيكر
مافوش ضحكة
شهادته واخدة عالكحكة
وعالمحكى مانيش ضامن
حقيقة وسرها الكامن
مسرسب غصب مني الصوت
ولو هايفوت
فأوضتي أبرد من الدنيا
وقلبي خريف على الآخر
مانيش ساخر
لكني وحيد
ولسه عنيد مع الحاصل
دواير رايحة في فواصل
ورغم الحزن راح أواصل
***
ما أنا عمل إيه؟!
غريق
والقلب متشعبط في قولة «ليه»
ومش فاهم
ومستني إجابة واحدة لسؤالي
تحط رحالي من حالي
تاخدني لسكة مفتوحة بعيد خالص عن الغربة وعن صحبة ما بتشبعش
ولو ما نفعش
تسبني في حالي ولنفسي وهاتصَرّف
راح هاعمل روحي بتَصَرُّف كأني حويط
وبيري غويط
وهابقى عبيط
لزوم المشي ع الموضة
وهارجع تاني للروضة مادام حكمت
وكالعادة
***
مل الحنين من قهوتي السادة
شبع الكلام من همي بزيادة
شك في ثبات القدرة ع الكتمان
عشمان يبان
إن الحياة ماشية
وإن الصعب بيعدي
وإن المستحيل عادي
وفيروز لاقت شادي
فطبيعي جداً
إني أنادي على الممكن
وع المعقول
لكني زهقت
خلاصة القول
مانيش مقفول
لكني واقعي أكتر
وكوني طهقت
ده مش أخطر من العادي أو الموجود
بقيت موعود
بكل جمود
ولو مولود على الهامش
ف لسه هاعيش كده وكاشش
ولو مفرود لازملي حدود عشان طايش
مانيش حايش حنيني لدنيا واخداني لكني قلوق
وكل ما أفوق
الاقي نفسي وحداني
هاجرني الشوق
ومن مدة بأقول ياني
ووحشاني حكاية كنت بأحكيها عن التغيير
ونفسي أطير
لكني فقير
وفقري أصله سوريالي
وعمر البال ما كان خالي
***
مفيش فايدة
نيران قايدة
ونفسي في مرة أطفيها وأعيش مستور
لكن السور
بعيد
عالي
ومن بختي لقيت حالي وأفعالي سايقها الحزن
عاكسني الوزن
بدم تقيل
وقلت يا ليل
لقيت عيني عليه بتبكي
لمين هاشكي؟!
ولو هاحكي
مانيش ضامن
حقيقة وسرها الكامن
مسرسب غصب مني الصوت
.المصدر: البوابة نيوز
كلمات دلالية: أعيش قلق محمد الكاشف بكرة
إقرأ أيضاً:
هالة صدقي تحتفل بعيد ميلاد نجليها برسالة مؤثرة
متابعة بتجــرد: نشرت الفنانة هالة صدقي عبر حسابها الخاص في “إنستغرام” صورة تجمعها بنجليها التوأم احتفلت بها بعيد ميلادهما الـ16، وعلّقت عليها برسالة مؤثرة عبّرت خلالها عن مشاعرها كأم في رحلة مليئة بالتحديات والنجاحات، واستذكرت اللحظات الصعبة التي عاشتها، والمراحل التي جمعت بين التعب، الفرح، النجاح، والفخر بهما.
علّقت هالة على الصورة قائلةً: “مرت 16 سنة كان فيها الصعب، وكان فيها الحب، كان فيها حزن وتحدي ونجاح، كان فيها حاجات كتيرة أوي… سهر وتعب وقلق وخوف ومذاكرة ودكاترة وفرح، الحمد لله وأشكرك يا رب إنهم عدّوا بنجاح”.
وأضافت: “يا رب يقدّرني أعدّي بيهم في الدنيا اللي بتزيد صعوبة كل يوم، يا رب ينجّيهم من كل الأشرار اللي في شكل بشر، ويا رب ما يعدّوا في كل الصعوبات اللي عدّيت فيها، ويبعدهم عن النفوس الشريرة، يا رب احفظهم… يا ريت كل أصحابي يدعوا لهم دعوة حلوة، يمكن ربنا يسمع واحدة منهم”.
ولاقى منشور هالة صدقي تفاعلاً كبيراً من متابعيها، حيث انهالت عليها تعليقات التهاني والدعاء من أصدقائها وجمهورها، متمنين لتوأمها حياة سعيدة مليئة بالنجاح والفرح.
main 2025-03-10Bitajarod
الحوز.. استنفار بأمزميز بعد العثور على مسدسين داخل ورش بناء