بالمصرى.. هوس الترند.. محتاجين نعالج أسباب المرض
تاريخ النشر: 11th, November 2024 GMT
تابع أحدث الأخبار عبر تطبيق
للأسف من الآثار السلبية لمواقع التواصل الاجتماعي وفخ التطبيقات المجانية للظهور على الهواء بكبسة زر، وفقر النفوس والفلوس والأخلاق والقيم والتربية والثقافة والوعي، وحلم الثراء السريع بدون معاناة.. سقوط الكثير في مستنقع هوس الترند وأصبحوا فاتحين أبواب بيوتهم علشان نتابع معاهم حياتهم اليومية وأدق التفاصيل حتي لو كانت كاذبة ومفتعلة.
وطلعت علينا عائلات علشان يعملوا تحديات العجب العجاب: مين أسرع واحد حاياكل كيلو مِش بدوده؟.. مين أسرع واحد حاياكل حلة محشي كرنب؟ وكيلو قرون شطة أو بطة بعضمها ووزة بريشها؟!.
ده غير بقي عرض الروتين اليومي في طبخ صينية البطاطس ومسح الشقة وتنفيض المراتب وملو القلة بشكل مقزز ولبس بيشف القبح اللي تحته، وغطا وش علي هيئة حجاب يسيء للدين وللمصريات.
ويطل علينا أم اللول وأم أربعة وأربعين وأم وئام وأم حسام وأبو البنات وقريب ونسيب وحبيب وئام وحسام ولول وظاظا وكاكا..
وكل ماتعمل فضايح أكتر الترند يزيد والفلوس تكتر وينزلوا علينا بليڤل الوحش طلاق وشتايم وصلح وضرب في الشارع ويحطوا صورة سودة ويكتبوا "قدر الله وماشاء فعل" ويسيبوك تقلق كام يوم وتتابع ويطلعوا بعد كده ببوست "الحمد لله أنا بخير بحبكوا".
ده فيه واحدة عملت نفسها انتحرت واختفت كام يوم وبعدها طلعت تقول الأكاونت كان مسروق.. واللي كمان يصوروا نفسهم في مستشفي ومعلقين محلول الكركديه ويطالبونا ندعيلهم.
نحضر معاهم الولادة والسبوع والمغات لطفل ماتولدش أصلاً ويبتدي بقي أصحاب البراندات المضروبة اللي ماحدش عارف مصدرها من شامبوهات وكريمات وأكلات وملابس داخلية وخارجية وأي حاجة يدفعولهم فلوس علشان يرشحولنا المنتجات.. والغلابة يصدقوا ويشتروا ومنهم اللى شعره بيقع أو بيمرض بسبب المنتجات مجهولة المصدر.
ويبتدي العز يبان وينقلوا في شقة جديدة أو فيلا ببسين وعفش كله جديد وعربية فنفوسهم تضعف أكتر ويبقوا مثل أعلى للمحتاج ويرخصوا نفسهم أكتر علشان يلموا فلوس أكتر وأكتر وفيهم ناس اشتروا بيوت في تركيا ودبي ويضحكوا على الناس بسيناريوهات مقالب مفبركة بيعملوها في بعض وتمثيليات بيصدقها السذج ويتابعوا الحلقات زي ماكانوا زمان بيتابعو ليالي الحلمية أو فوازير رمضان.
والأبشع إن في بعض الفنانين قرروا هما كمان يعملوا كده ويدخلوا لايف بأحكام وكبس كبس وادعموني ومناظر تغم النفس بأحكام مقززة ادلق على نفسك بن محوج.. اشرب ميه بدقيق بشطة.. ألطم صوت.. استحمي إحلق.. فاضل شوية ويحكموا علي بعض بالإعدام شنقاً رمياً بالرصاص علشان الريتش يعلي والتكبيس والدعم يزيد والفلوس تكتر والعداد بيعد والحسابة بتحسب والكارثة الأكبر إن هذا الفيروس اللعين أصاب الريف ويطلع علينا الشيف نجعاوي لابس لبس ماغسلوش من ساعة ميلاده. وماشي حافي ويطبخلنا بمية الترعة وياكل بشكل مقزز ويقولوله يا عالمي ويبقي مثل أعلى.
ده غير أبو خالد بشيبته الزايدة وأم جاسر بالفاوتشح وسنية الوحش اللي لابسة أسدين قصر النيل الدهب وكأنها فاترينة معروضات ويقولولها يا كابيرة ونلاقي مهرجانات عجيبة بتسلمها تاج الجزيره أو السلطانية تقديراً وعرفاناً لدورها في المجتمع.
وتبتدي قنوات بتبيع الهوا لأي حد نفسه يبقي إعلامي بفلوسه ومواقع بير السلم تستضيفهم ويطلعوا كأنهم نجوم وأسئلة رخيصة عجيبة وإجابات أرخص وأعجب وتبقي مسابقة مين اللي حايلحق يستضيفهم علشان المذيع أو المذيعة برضه مصابين بهوس الترند.
أعتقد ياسادة إحنا محتاجين صحوة ووقفة وتكاتف علشان نحصن مصر من فيروس قاتل بيقضي على الأخضر واليابس وبيخلينا للخلف در.. أعتقد إن ده مشروع قومي لازم كل العقلاء والحكماء والمثقفين يتبنوه.. وأعتقد كمان إننا محتاجين إعلام موازي ومختلف وأطباء نفسيين وخبراء اجتماع.
الخلاصة: أعتقد إننا محتاجين نعالج أسباب المرض قبل العرض اللي كتير مننا عارفينها، ويكون بجد ده مشروعنا القومي ونبني أجيال تقدر تحافظ علي مصرنا المحروسة لأنها تستحق.
*فنانة مصرية حاصلة على الدكتوراه في الغناء الأوبرالى.
المصدر: البوابة نيوز
كلمات دلالية: العجب العجاب سحر نوح
إقرأ أيضاً:
غزال الملعب|حكيم يعلن انضمام ابنه عمر لنادي إسباني شهير.. فيديو
نشر الفنان حكيم مقطع فيديو عبر صفحته على موقع التواصل الاجتماعى فيسبوك يعلن فيه عن توقيع ابنه عمرلنادى أسبانى شهير.
وقال حكيم : “مين موجود معايا دلوقتي، يقول للكابتن عمر حكيم مبروك، وقع مع نادي أسباني بعد ما كان بيلعب في سويسرا.. وهناك بيسموه غزال الملعب، ألف مبروك يا غزال”.
حقيقة القبض على حكيمكانت قد انتشرت أخبار خلال الساعات الماضية تفيد بالقبض على المطرب حكيم فى الإمارات لحيازة مواد مخدرة .
وكشف الفنان حلمي عبد الباقى وكيل أول نقابة المهن الموسيقية أن هذا الكلام عار تماما من الصحة وكل ما تردد حول هذا الأمر شائعة.
وَأضاف حلمي فى تصريح خاص لـ صدى البلد أن حكيم لم يتم القبض عليه فى الإمارات قائلا: إزاى ياجماعة تقولو حكيم اتقبض عليه بمواد مخدرة هو حكيم أصلا بيشرب سجائر.
أحيا مؤخرا حكيم حفل بالمنيا وسط حضور عدد كبير من جمهوره المتواجد هناك، وقدم عدد من أشهر أغانيه القديمة والجديدة.
وكشف حكيم في كلمته للجمهور ولأهالي بلدته المنيا عن سر سعادته الحقيقة، قائلا: "كل الدنيا تعرف ان بداياتي من هنا.. من المنيا.. وكل الدنيا عارفه ان لكم فضل علي.. وديما بتباهي بده.. وكانت كل امنياتي وانا صغير هو ان اكون مشهور علشان تشجيعكم لي ما يروحش هدر.. وبفضل ربنا وبتشجيعكم لي.. غنيت في كل مكان في العالم واسعدت وفرحت ناس كتير.. بس صدقوني انا ما بفرحش غير وانا في وسطكم.. علشان انتم أعز الناس عندي.. أهلي وعزوتي وناسي".
حضر حكيم الحفل في كامل اناقته مرتيديا ملابس "كاجوال" وبمجرد صعوده علي خشبة المسرح اشعل الحفل بالعديد من وصلات الغناء والطرب علي مدى قرابة الساعتين بعدد كبير من اغانيه التي تألق بها طوال مشواره الفني بداية منها "السلام عليكم" و"آه يا قلبي" و"حلاوة روح"، وغيرها ممن قدمها تلبية لرغبات الجمهور بآداء استعراضي مبهر حصد المزيد من أجواء البهحة والإثارة.
الصور الأولى لـ حادث سيارة صلاح محسن في القاهرة الجديدة