شقيق ضحية قهوة أسوان يكشف اللحظات الأخيرة في حياة أخيه

يواصل موقع صدى البلد، نشر نص أقوال شقيق المجني عليه، في واقعة قيام متهم بإنهاء حياة نجل صاحب قهوة أسوان في منطقة الكوربة بمصر الجديدة.

قهوة أسوان

وجاء نص أقوال شقيق الضحية :"في يوم الواقعة اتفاجأت بالمتهم عمال يضرب في أخويا  بالمطوه والناس عمالة تحوش فيه مش عايز يسيبه لحد ما الأهالي عرفت تحوش وشالته من فوق اخويا ومسكته لحد ما الحكومة جات أخدته".

وما الذي حدث عقب ذلك ؟
أنا أول ما قفلت مع ايمن ابن عمتي روحت لمكان الواقعة عشان اشوف ايه اللي حصل واشوف محمد اخويا.

وما الحالة التي شاهدت عليها المتوفى إلى رحمة مولاه تحديدا آنذاك؟ 

لقيته واقع على الأرض وهدومه كلها دم وبطنه طالعة برة وراسه بتنزل دم وبيجيب دم من كل
حته في جسمه.
 

وما الذي بدر منك حال رؤيتك للمتوفى إلى رحمة الله سالف الذكر؟ 

أنا اول ما شوفته جريت عليه قعدت اهز فيه وحطيت ايدي على رقبته لقيت لسه فيه نبض شيلته مع الأهالي وأخدته على المستشفى .
إلى أي مسشفى تحديدا قمتم بنقل المتوفى إلى رحمة مولاه إليها ؟
إحنا نقلناه مستشفى هليوبوليس .

وما الذي حدث حال وصولكم للمستشفى؟
إحنا اول ما وصلنا دخلوه المستشفى وحاولوا يعملوا له إنعاش بس هو كان ميت.
حدد لنا تحديدا مكان رؤيتك للمتوفي إلى رحمة مولاه ؟
هو كان واقع على الأرض جنب الرصيف اللي جنب محل العصير اللى اسمه جنة الفواكه في شارع المسله وكان فيه كراسي متكسره جنبه كتير وعلى الرصيف المجاور ليه وكان فيه دم على الأرض وفاكهة مرمية على الأرض من محل العصير وتجمع كبير من الأهالي .
 

وما هي حالة الطريق من حيث المارة ؟
هو الشارع كان زحمه جداً والناس كانت ملمومة حوالين اخويا وهو واقع على الأرض .
وهل تقف على سبب الحالة التي شاهدت عليها المتوفى إلى رحمة مولاه حال وصولك
للمكان آنف البيان؟
عشان هو مضروب بمطوه في بطنه وكل جسمه كان بينزل دم .
وهل تقف على شخص محدث إصابة شقيقك المتوفى إلى رحمة مولاه محمد عبد
الرازق محمد عبد الرحيم ؟
اللي عمل كدا اسمه ناصر ص.م.
كيف وقفت على ذلك ؟
علشان الأهالي في المنطقه قالولي ان ناصر هو اللى قتله وايمن ابن عمتي قاللي ان ناصر هو اللي عمل كدة وقالي الحق أخوك مات على ايد ناصر وكان فيه خلافات سابقة بينه وبين اخويا محمد.

كما حصل "صدى البلد" على نص التحقيقات في جريمة قتل صاحب قهوة اسوان بمنطقة الكوربة بمصر الجديدة حيث أجلت محكمة جنايات القاهرة أولى جلسات محاكمة المتهم لجلسة 1 ديسمبر المقبل للاطلاع. 

وتضمنت أوراق التحقيقات في القضية رقم ١٩٦٥٦ لسنة ۲۰۲٤ اداري مصر الجديدة رقم الحصر ٧٧١ سنة الحصر ٢٠٢٤ اقوال المتهم ناصر صابر مشعال التي سرد خلالها تفاصيل ارتكابه الجريمة وتمزيق جسد المجني عليه وسط الشارع وإلى نص التحقيقات: 

 

اسمی

ناصر صابر مشعال

السن ۲۸

اعمل / بكالوريوس نظم ومعلومات إدارية

 

س / ما تفصيلات إقرارك ؟

ج : اللي حصل ان فيه خلافات بيني وبين محمد عبد الرازق كتير ومن حوالي خمس سنين حصلت بينا مشكلة واتخانقنا مع بعض وضربنا بعض وبعدها والناس جت حاشت بنا والموضوع خلص، ومحمد كان واخد حصة في العمارة اللى محل العصير بتاعي فيها في شارع المسلة الكوربة، مكنتش عايز يكون ليه حصة في العمارة اللي أنا فيها، وكان في قضايا كتير بينه وبين صاحب العمارة ولما كنا بنشوف بعض كان بيحصل ساعات مشادات بنا لكن الناس كانت بتحوش والموضوع بيخلص وآخر مشكلة كانت امبارح، لقيت محمد كان جاي يزعق ويشتم من عند قهوة أسوان بتاعته ولقيته ماشي قدام محل العصير بتاعي، وعمال يزعق لأن في خلافات سابقة بنا فخرجت من المحل وكان معايا مطوه في جيبي وكنت قرفان منه ومن المشاكل اللي بتحصل بنا، طلعت المطوه من جيببي ودخلت على محمد عبد الرازق وضربته بيها أكثر من ضربه ومش فاكر كام ضربه تقريباً ووقع على الأرض وفضلت اضرب فيه بالمطوه ووقعت فوقه على الأرض ومحستش بنفسي لقيتني عمال اغرز المطوه في بطنه.

والناس اتلمت وقعدت تحوش وانا مكنتش عايز اسيبه وفضلت أضرب فيه لحد ما الناس حاشتني، وقعدت الاهالي يضربو فيا بالكراسي عشان اقوم من عليه لكن فضلت، اضرب فيه بالمطوه وبعدها قولتله انت اللي وصلتني اني اعمل فيك كدا، وبعدها الناس حاشتني وقومتني من عليه وانا رميت المطوه.

ودخلت محل العصير تاني وبعد كدا فيه اتنين أمناء شرطة جم خدوني على موتسيكل وودوني على قسم مصر الجديدة، وفتشوني هناك كان معايا مفاتيح البيت بس وبعدين دخلوني وعملوا محضر باللي حصل، ودخلوني الحجز وجيت النيابة النهاردة وهو ده كل اللى حصل.

المصدر: صدى البلد