شوبير يعلق على غرامات الكاف.. تفاصيل

علق الإعلامي أحمد شوبير نجم الأهلي السابق على الغرامة التي وقعها الاتحاد الأفريقي لكرة القدم "الكاف" على نادي الزمالك بسبب التهديد بالانسحاب من بطولة السوبر الأفريقي إلى جانب إيقاف شيكابالا وناصر منسي ثنائي الفريق 3 مباريات وتغريمهما 10 آلاف دولار عبر تصريحاته ببرنامجه الإذاعي مع شوبير.

وقال شوبير:"أرجوكم محدش يزعل مني، وخدوا الكلام بقلب مفتوح متاخدهوش بأهلي وزمالك، والكلام اللي إحنا شطار جد في ده، لو عايزين نصلح يعني.

امبارح لجنة الانضباط في الكاف أصدرت غرامات تقيلة وشديدة على نادي الزمالك، والناس بتقول إن اتحاد العاصمة الجزائري لما انسحب من نصف نهائي الكونفدرالية، اتغرم 40 ألف دولار بس".

 

وأكمل:"أولا لازم نكون أقوية شويه في هذه اللجان، ثانيا لازم برضه نعرف الصح من الغلط، عشان منقعش في المحظور وتحصلنا المشاكل اللي بتحصل دي، الإيقاف لناصر منسي 3 مباريات عشان خالف المادة 147 من قانون الانضباط وتم تغريمه 10 آلاف دولار عشان إشارة الذبح".

 

وأضاف:"يا جماعة يا لاعبتنا افهموا شويه واعرفوا القوانين شويه، ذنب نادي الزمالك ايه يتخصمله 300 ألف دولار، وإيقاف 2 لاعيبه، وده لأنهم سايبين الحبل ع الغارب أي حد يقول هنسحب ومش هلعب وتهديد، ومين يقعد ومين يتكلم معاهم وشغلانة، يا جماعة حطوا نظام وأساس عشان الدنيا تمشي صح".

واختتم: "الناس في الزمالك قالوا هنقدم التماس، مستنيين الالتماس ورد الفعل على الالتماس، بس من فضلكوا اشتغلوا المرادي صح، مش عايزين مشاكل أكتر من كده الله يخليكم، الناس بتتعذب".

المصدر: صدى البلد