«بطلت أكل بسببه».. هند صبري تكشف موقف مضحك مع الفنان عادل إمام

كشفت الفنانة هند صبري، كواليس فيلم «عمارة يعقوبيان»، خلال ندوتها في مهرجان الجونة السينمائي في دورته السابعة، بحضور عدد كبير من الفنانين.

هند صبري تتحدث عن تعاونها مع الفنان عادل إمام

وقالت هند صبري: «فيلم عمارة يعقوبيان كان حلو ومعجزة، كان حلم إنك تجيب العدد الكبير من النجوم دا في عمل واحد، ويكون من تأليف وحيد حامد، وكنت محظوظة إني هشتغل فيه، وأول ما كلموني قالوا ليا عايزينك معانا فرحت أووي».

وأضافت: «الفترة دي كان في منتجين عندها الجراءة تعمل افلام كبيرة زي عمارة يعقوبيان، وأفلام صغيرة زي جنينة الأسماك، وإحنا كنا مبسوطين كنا حاسين بنلعب، كنا عايزين طول الوقت نشتغل، ودلوقتي كل حاجة بقت محسوبة بزيادة، ونفسي يبقي عندنا روح المغامرة». 

كواليس لقاء عادل إمام وهند صبري

وتابعت هند صبري حديثها عن مهرجان الجونة: «أنا كنت مرعوبة من عادل إمام، في مرة خدنا الأستاذ مروان حامد ووحيد حامد له الببت قبل التصوير، وأنا سمعت رجله وهي نازلة على السلم واتوترت جدا، لقيته نازل بيقولي أنتي بقا هتحبينا أنا وابني، أنتي مين عشان تعملي كدا، وضحكنا وهزرنا، وفي أول مشهد كنت في بريك وباكل لقيت الأستاذ عادل جاهز يصور، فنادوا عليا عشان كان واقف قدام الكاميرا، قمت والأكل في بوقي، قالي أنا مش هصور مع ممثل. الأكل في بوقه، ومن ساعتها وأنا مش باكل، والفيلم دا حقق نجاح كبير، والسينما اختلفت بعده».

المصدر: الوطن