حكاية «شيرين» في محكمة الأسرة: «رفض توثيق الزواج وسايبني معلّقة»

«رفض يسجل عقد الجواز لمدة 5 سنين، وعرفت الكارثة لما طلقنى غيابى وبعدها فضلت معلقة على ذمته 4 سنوات، وبسبب تزويره لعقد الجواز ما بقتش عارفة أنا أبقى مين النهارده!».. قصة غريبة عاشتها شيرين سيد، صاحبة الـ40 عاماً، وسط رسائل التهديد المستمرة وتوعده بإيذائها حال رفعها أى دعوى قضائية تطال سُمعته، فبعد أن لاحظت اعتياده ترديد يمين الطلاق دون حساب، أصبحت لا تدرى إن كانت ما زالت على ذمته أم مطلقة، وخلال رفضه توثيق طلاقها هجرها عامين، لتكتشف فى نهاية المطاف أنه لم يسجل عقد الزواج وكان مجرد ورقة مزورة سرقها منها بعد آخر شجار.

«أنا عايشة فى منطقة شعبية وما كملتش تعليمى الابتدائى والناس كل همها تعرف بعض.. كل همهم بناتهم تتجوز وتتستت، وبسبب نشأتى البسيطة ما كانش قدامى أعرف أختار شريك حياة بنفسى، وتعرفت عليه عن طريق الجيران هما اللى رشحوه لأخويا ووافقت على الزواج منه، وبعد 6 شهور عملنا الفرح». تقول «شيرين» إن حياتهما الزوجية بدأت بحياة يملؤها الحب والفرح، لتتحول تدريجياً إلى حياة روتينية يشوبها بعض المشكلات، حينها لم تعد قادرة على تخطى الأزمات وتسوية الخلافات، ثم مرت فترة على الزواج وزادت الخلافات بشكل غير مبرر، وفى كل مشكلة يطلقها وبعدها يعود لمصالحتها وفى كل مرة عائلتها يجبرونها على العودة له.

«اتجوزته تقريباً من 9 سنين وبحمد ربنا إنه ما رزقنيش بأطفال منه، عشان أكيد كانوا هيشوفوا المرار معايا وهيتظلموا مع أب زى ده، أنا عشت حياتى مذلولة مع أهلى، وربنا كتب عليا الشقا مع راجل معندوش ضمير ولا يتقى الله، ومش عارفة إزاى كتبنا كتاب وماليش عقد زواج متوثق إننا متجوزين، وإنه ماليش أى حقوق عنده، ومش قادرة أستوعب إنه من البداية كان ناوى الغدر بيا عشان لو اتطلقنا ماعرفش أثبت حقى، أنا فاكرة كويس إنه كان معايا قسيمة جواز بس سرقها منّى، وقال لى دى كانت مزورة»، مؤكدة أنها بتلك الحيلة أصبح ليس لديها أى حقوق، وفقاً لحديثها.

«بقالى سنين بحاول أثبت إنى متجوزاه، لكنه بيروح يهدد الناس الشهود وبيشوه سمعتى، وكذا مرة أجّر ناس عشان تضربنى، وأثبتت الضرب فى كذا محضر رسمى؛ وكنت بتنازل من كتر الخوف، وعلى الرغم من كل اللى مريت بيه أنا لسَّه بحارب وعايزة حقى، وقررت أرفع عليه قضية تزوير عقد الزواج، لكن الموضوع وقف، لأنى كل مرة كنت بخسر الدعاوى». بعد أن فاض بها الكيل، قررت أن تذهب بمفردها إلى محكمة الأسرة بالكيت كات وأقامت ضده دعوى إثبات زواج حملت رقم 40976 دون محامٍ حتى لا يقوم بالتلاعب بها مرة أخرى.

المصدر: الوطن