"انا أسف يا أمي".. اعتزال المذيع الداخلي لاستاد القاهرة بعد سبه من بعض جمهور الأهلي

تقدم محمد صافي، المذيع الداخلي لاستاد القاهرة الدولي، بإعتزاله جميع أشكال الإذاعة الداخلية لكرة القدم المصرية المحلية، موضحا أنه سيكتفي بالإعلان عن تسليم النادي 2 بطولة إفريقيا منهم نهائي القرن ودرع الدوري.

اعتزال المذيع الداخلي لاستاد القاهرة بعد سبه من بعض جمهور الأهلي

وكتب المذيع عبر حسابه الشخصي‏ على مواقع التواصل الاجتماعي تويتر: "انا اسف يا أمي"

الاسبوع اللي فات فى حفل تسليم درع الدوري، تم سبّي بالأم (الاهلاوية جدا جدا على فكرة) من قبل "بعض" الجماهير، ولم اعلم هذا الا اليوم اللي بعده لما الفيديوهات اتبعتتلي، ولو كنت سمعت السباب فى ارض الملعب كنت سلمت المايك ومشيت إحتراما لأمي ولنفسي ولمهنتي.

متفهم اكيد ان الجمهور كان عاوز يهتف ويشجع، حقهم ١٠٠٪ وبالنسبالهم الصوت كان عالي والاغاني كانت مدايقاهم فا شتموني انا بالام وانا بسميهم "اعظم جمهور فى الكون". عمري ما ازعل من اطفال من دور اولادي انساقوا وراء هتاف، لكن مش عارف اتخطى منظر اللعيبة فى الملعب وهما بيضحكوا، منهم نفس اللعيبة اللي دافعت عن غريمهم لما اتشتم بحرقة كبيرة ولم يفكروا فى الدفاع عن راجل غلبان ابن ناديهم ضحى بالكثير ليكون هناك لاعلانهم "ابطال". لعيبة كنت اتشرف باعلان اساميهم فى محافل دولية كثيرة.

"أنتم الرمز الأبدي".. شيكابالا يوجه رسالة مؤثرة لجماهير الزمالك بعد التتويج بالسوبر الأفريقي فحوصات طبية لثلاثي الزمالك فور العودة من السعودية

مش قادر اوصفلكم صعوبة المكالمة وانا بكلم امي بعتذرلها ان شغلي جابلها الشتيمة القذرة بهذا الشكل. قالتلي "ربنا يسماحهم يا ابني ويديهم على قد نيتهم". اشكر كل من اعتذر لي على تيكتوك ومنصات اخرى واعتذارهم فوق راسي ليوم الدين، لكن مش عارف اتخطى اللعيبة اللي كانت بتضحك، مع ان سهل جدا انك كنت تشاور للجمهور "لأ".

كان صعب جدا اني اتكلم فى الموضوع ده قبل ماتش السوبر تفاديا لأي لغط ممكن يحصل، لكن بعد ماتش امبارح قررت ازالة الثقل ده من على صدري. لذلك قررت اعتزال جميع اشكال الاذاعة الداخلية لكرة القدم المصرية المحلية. اكتفى باعلان تسليم النادي  اللي بعشقه منذ الطفولة واللي هفضل اشجعه لحد ما اموت، ٢ بطولة افريقيا منهم نهائي القرن ودرع الدوري. وتحت امر الدولة فى اي محافل رياضية غير كرة القدم، لأني لن استطيع الاحتفال باسماء من ضحك على سباب امي، بالظبط زي ما عرفتش احتفل باسم لاعب متحرش فى بطولة افريقيا ٢٠١٩. لن استطيع ان انافق نفسي.

و إيمانًا بدوري المجتمعي، سأعكف على تمرين جيل جديد من المذيعين الداخليين لأكمال مسيرة بدأتها من ٢٠١٩ هدفها الارتقاء بمهنة الاذاعة الداخلية فى مصر ووضعها فى المكانة اللي تستاهلها، وتاني تحت امر الدولة فى اي محفل رياضي غير كروي، وافتخر بكل الشغل اللي اشتغلته وشاكر جدا للفرصة اللي اتيحت لي.

بعتذر للجمهور اللي كان موجود فى الاستاد، حتى اللي سبوني بالام دون وجه حق، أو اي حد زعل من شغلي، حقيقي انا اسف ليكم. اتعلمت زمان انك لن ترضي الجميع، فا ارضي ضميرك فى شغلك وده اقصى استطاعتك

حقيقي هارد لك لعيبة الاهلي على خسارة السوبر، هفضل اشجع الكيان لحد ما اموت مهمًا كان

تواضعوا يرحمكم الله

شكرا لجمهور مصر العظيم على كل الذكريات الجميلة، واراكم فى محافل قادمة ان شاء الله

حقك عليا يا أمي".

المصدر: بوابة الفجر