لما توري المليشيا انو الجيش ماشي يهاجم المنطقة الفلانية فاكرها رجالة

تعال هنا يا شاطر يالعشاء أبلبن العاملين فيها رهيبين بترفعوا في تحركات الجيش والمتحركات فاكرين دي شطارة !
هل فيها سبق صحفي !

تحديد المواقع والمتحركات ونوع العتاد للجيش فاكر دي خدمة منك للجيش !
لما تحدد اماكن تواجد الجيش فاكرنها فلاحة منكم !

لما توري المليشيا انو الجيش ماشي يهاجم المنطقة الفلانية فاكرها رجالة والناس بتصفق ليك وانت فرحان ؟

عارفين بسبب الشفقة والتخوين والفارغة بتاعتكم دي انتوا كنتوا سبب في كم حفر كمين لمتحركات الجيش !
ناسين متحرك بحري ولا ناسين متحرك سنار بالخفة انتوا كنتوا السبب في الكمين لقوات الجيش والمشتركة !

الشفقان يلزم بيتوا ويريح الخلق ويسكت لكن ما تشتغلوا انتوا إستخبارات مجانية لمليشيا الدعم السريع !

وحكاية الزول يحاول يشتغل تكتيك ويشغلكم عن الجيش دي حاجة عظيمة بتخلي الجيش يشتغل بالراحة وبهدوء …

الناس الشغالة بترفع معلومات الجيش بكل عفوية وعدم قصد ديل هم بمثابة استخبارات للجنجويد مجانية !

حكاية التخوين والشتيمة والنبذ ل بت الماجدي انا ما فارقة معاي بشئ انتوا هسي في حالة ضياع بكره بتشوفوا بزوايا شوف نجيضة لكن ما تضروا الجيش من غير قصد
اخواني الله ينور بصيرتكم ياخ

عائشة الماجدي

إنضم لقناة النيلين على واتساب
.

المصدر: موقع النيلين