تامر حسني : الاستفزاز سر نجاح كلماتي وألحاني

تحدث الفنان تامر حسني عن ذكرياته مع تأليف وتلحين أغانيه في بداياته والتحديات التي واجهها في نجاحه، وذلك عبر حسابه الرسمي على موقع تبادل الصور والفيديوهات  الشهير “انستجرام” .

تامر حسني صحفي استفزني وخلاني أكتب وألحن 

بدأ تامر حسين سرده لحكاية التأليف والتلحين، قائلًا" زمان وأنا ببدأ حياتي مكنتش ناوي إني أصمم أكتب أغانيا و ألحنها عملت أول لحن في حياتي لأغنيه إسمها راحت حبيبتي في ألبوم تامر و شيرين و إنتوا عارفين الألبوم ده إزاي نجح و كل أغانيه نجحت و كانت الأغنيه كلمات الشاعر الكبير بهاء الدين محمد طلع صحفي ينتقدني و كتب هو أنت لحقت تنجح عشان تلحن … فسألت نفسي هو كتب كده ليه مع إن الأغنيه من أنجح أغاني الألبوم و أكتر اغنيه ساعتها أثرت في الشباب ،، فسألت هو مين الصحفي ده طلع صاحب مطرب معين فعرفت إنه يمكن يكون غيران شويه و خلاص".

 

وتابع قائلًا" بعد شويه نزلت أغنية عيونه دار و كسبت مسابقه كبيره جداً في مصر ساعتها على نجوم اف إم و أخدت لقب أغنية القرن فطلع نفس الصحفي كتب إنت مصمم تلحن ليه تخيلوا أغنيه حاصله على لقب أغنية القرن و بتتحارب !!! من هنا خدني الحماس أدور جوه نفسي و أركز جامد إني أغيظه و مش بس ألحن لاء أنا هلحن و هكتب أغانيا و فعلاً من قلبي بشكر الصحفي و المطرب اللي خلاه يكتب كده لآن لولاهم مكنتش عملت الأغاني اللي هذكرها دي و مكنتش هبقى في مكانتي دي و ياريت تركزوا إنهم كلهم كلامي و لحني عشان في ناس كتير متعرفش
نور عيني .. كل مره .. لما بتكون بعيد .. أنا مش عارف اتغير .. يا بنت الايه .. قسمه و نصيب .. هي دي .. أنا ولا عارف .. يا تاعبني .. ضحكتها مبتهزرش .. ماتوصينيش .. إرجعلي .. ميحرمنيش منك .. الله يباركلي فيك .. صوتِك .. بغير عليها .. اسكتي .. حرقة دم .. زي الايام دي .. تليفوني رن .. سي السيد .. 100 وش .. هدلعني …
‏come back to me

 

 

وأضاف" طبعاً لسه في أغاني كتير بس دول اللي حضروا في ذهني دلوقتي و لما لحنت و ألفت لغيري كانوا أغنيتين
قوم اقف وانت بتكلمني لبهاء و بص بقى لشيرين ???? كل دول كلماتي و ألحاني تخيلوا بقى قد إيه الصحفي ده و المطرب اللي زقه عليا فادوني في مستقبلي قد إيه كلمه جارحه المقصود منها تحطيمي بكرم ربنا أقدر أحوّلها لأحد الأسباب اللي تخليني أنجح و أكمل ٢٠ سنه من كلامي و ألحاني بكتب البوست ده عشان عارف إن كتير مننا بيسمع كلام مُحبط كل يوم فا بلفت نظره إنه عنده فرصه كل يوم إنه يسمع كلمه تضايقه عشان يحولها لطاقة نجاح عظيمه تفرق في مستقبله و حياته"

 

كان قد طرح تامر حسني أخيرًا أغنية “جامدين جامدين”، التي سجلت أكثر من 4 ملايين مشاهدة، وتقول كلماتها “و حد زعلان قابلك هاته من ايديه قوله في ناس فرحانه وجو جديد عليه لو جالنا بس هيطلع من كل اللي فيه احنا لمتنا دي بالدنيا كلها كل دقيقه انبساط بنستغلها والسكه اللي بتزعل نمشي عكسها رقص اللي مكشر دلعه وتعالى من الحزن نطلعه يالا خلي اليوم ده نولعه ونكتر الحلوين جامدين جامدين وده كده كده صحبتنا الحلوه مأكده لأ بقى والحلو في كل ده احنا كده من سنين لسه الأيام الحلوه بينا مكمله والسهره جامده معانا ولسه مبيته واكيد بكرا اللي جاي اجمل من كده عدي وفوت وكبر وانسى ومتقفش فك الزعل علشان بقى وشك ميكرمش هنعيش الدنيا مره ياعم فكها رقص اللي مكشر دلعه وتعالى من الحزن نطلعه يالا خلي اليوم ده نولعه ونكتر الحلوين جامدين جامدين وده كده كده صحبتنا الحلوه مأكده لأ بقى والحلو في كل ده احنا كده من سنين”

المصدر: بوابة الوفد