إياد العسقلاني عن وفاة إيهاب جلال: «كان نفسي أشيلك على كتفي»

وجه إياد العسقلاني، لاعب روستوف الروسى الحالى والإسماعيلى السابق، رسالة خاصة إلى مدربه السابق، إيهاب جلال، والذي وافته المنية أمس الأربعاء.

وتوفي إيهاب جلال، أمس الأربعاء، على إثر وعكة صحية تعرض لها، يوم الأحد قبل الماضي، وأصيب بجلطة في المخ.

وكتب إياد العسقلاني عبر حسابه على موقع التواصل الاجتماعي "فيس بوك" اليوم: "كان نفسي أكون جمبك انهارده وأشيلك ع كتفي زي مانت كنت شايلنا في عينك وبتحمينا من أي حد".

وواصل: "كان نفسي أردلك جزء من الجميل الي انت عملته ليا كان نفسي مسبكش لوحدك كنت مستني أرجع أجازة عشان أحكيلك كل حاجة زي ما انت عودتني كانت نفسي مكالمتك معايا أو رسايلك متخلصش".

وأضاف: "كنت مستني اليوم اللي تخرجه فيه بالسلامة وتقف ع رجلك تاني كان نفسي أفضل أتعلم منك كل حاجه كان نفسي أودعك وأحضنك عشان أنا مش هحب قدك تاني".

وأردف: "كان نفسي أكون معاك في أول ليلة ليك وكان نفسي تفضل تطبب عليا لما بكون زعلان ومتكنش لوحدك سبتني ومشيت وسايبلي كلامك وصوتك في وداني بيفارقنيش من أول ما سمعت الخبر أنا اطمنت عليك لما شوفتك وانت رايح تقابل الوجه الكريم وأنا عارف أنك في مكان أحسن من هنا بكتير يا اغلي الناس".

وتابع: "ابنك مش هينساك وكنت عارف لما كنت بتقولي انت ابني اللي مخلفتهوش كانت من كل قلبك كل كلمه قولتهالي كانت صدق والله هشرفك وهخليك فرحان بيا زي مانت كنت بتتمنى وهتفضل في قلب ابنك عمري مهنساك يا حبيبي أشوفك على خير ي حبيبي وأرتاح هتوحشني يا أبويا".

واختتم: "اللهم في الليلة الأولى في القبر اجعل في قبره نوراً، اللهم اجعل قبره روضة من رياض الجنة اللهم اغفر له وارحمه واعف عنه واجعله قرة عينك يارب العالمين اللهم ثبته عند السؤال اسكنه في فردوس الأعلى يارب العالمين اللهم اجعله من الصالحين البارين المخلصين في الجنة يارب العالمين مع السلامة يا أنضف الناس مع السلامه يا حبيب قلبي مع السلامه يا بوب".

المصدر: الأسبوع