علي الطيب يتراجع عن رسالته لأبطال عمر أفندي: الفنان أناني ومش عيب
تاريخ النشر: 12th, September 2024 GMT
حذف الفنان علي الطيب منشوره الذي وجه فيه رسالة لأبطال عمر أفندي بعد استخدامهم مصطلح "حاجة 13 خالص" والذي استخدمها هو من قبل في مسلسل اهو ده اللي صار بشخصية وديع البساطي.
ونشر علي الطيب من خلال حسابه الشخصي منشور معلقًا:"تم حذف البوست
و الأسباب هى أنا ممكن أكون عبرت بشكل يزعل زمايلي من اللي اتكتب بس هما زعلوني بأنهم مذكروش في اي برنامج أو اي لقاء انهم اقتبسوها من وديع البساطي في مسلسل أهو ده اللي صار
مصطلح موجود في مصر زمان فعلا مش انا اللي اخترعتها "
واستكمل:"بس بيبقى كل ممثل بيبذل مجهود من أجل الشخصية تبقى لحم ودم مش كلام على ورق فقط وبيقول كلامه وخلاص
و ده كان جزء من مجهودي اللي تم أثناء تحضير الشخصية في المسلسل وبعد ما عرضت بعض المصطلحات على الأستاذ السيناريست عبدالرحيم كمال والأستاذ حاتم علي عليه رحمة الله
اختارنا اللي يتناسب مع الشخصية التي تعبر عن شخصيته واتوظف في الحوار بشكل مناسب ومنطقي للمشاهد من الأستاذ عبدالرحيم واتعرض المسلسل وربنا كتب لنا القبول في قلوبكم
و نجح المسلسل واتشهرت شخصية وديع البساطي
بمصطلحاتها اللي تعتبر كانت جديدة على الجمهور رغم أن الجملة ليها أصل ومعنى ووضحناه في المسلسل ".
وأضاف:"و أظن احنا في مهنة واحده يعني عارفين شغل بعض ونعرف بعض كويس وبينا كل خير لا يمكن يجيلي عمل فني أو اسكريبت واكتشف أن في جملة أو مصطلح مشهور لزميل ليه ونجح بيه واكرره أو اتجاهل مجهوده هو وصناع العمل واحترم نجاحه وحق كل فنان يغير ويبقى نفسه يعمل شخصية حلوة ويستمتع بأدائها المشاهد وده حق شرعي بس أظن ان التميز هنا هيكون في الاختلاف والاجتهاد المطلوب منك وليس الاستسهال
و لنفرض حصل وقولت مصطلح يخص شخصية فنيه لعبها زميل ومتفرجتش عليه أو مافيش حد نبهني..
يبقى أقل واجب بعد عرض المسلسل وعرفت المعلومة يبقى أقل حق سواء كتاب العمل أو أنا كفنان أوضح في أي لقاء
في اي برنامج أنه تم الاقتباس من العمل الفني اللي قبلنا
و وقتها مش هيكون ليه حق ازعل وأفهمها تجاهل من زمايلي لأني غصب عني مفهمتهاش غير كده ".
وأشار:"واللي يعرفني كويس عارف إني دايما مبتأخرش عن زمايلي وبفرح لنجاحهم من قلبي ولا عمري نفسنت ولا اتكلمت في تفاصيل شبه دي بس الموضوع لو مكنش يخصني كنت هقول كلمة حق في حق الزميل اللي سبق ونجح بشخصية وبمصطلحاتها اللي علمت مع الجمهور بفضل ربنا وأهم من كل ده اكتشفت أن بعض الصحفيين هيحولوا الموضوع لمشكلة وهيكبروا الموضوع بيني وبين حاتم وأبو سريع وآيه
و احنا اللي بينا كل خير وصحاب واخواتي وعلى راسي وربنا يعلم أنهم غاليين عندي بس حسيت اني مش شرط يكون زعلى من تجاهلهم يفرق معاهم ".
واختتم:"فا محبتش اسيب الموضوع يكبر وتاخد اتجاه مش لطيف
و طلبت من الشباب المسؤولين عن الصفحة تحذف البوست لأن العتاب والهزار هيقلب جد لحد ما اكتب بوست أوضح فيه وربنا ما يجيب زعل ولا مشاكل.
و على رأي البساطي
الفنان أناني ومش عيب ".
المصدر: بوابة الفجر
إقرأ أيضاً:
ياسمين صبري تُغير اسم مسلسلها الرمضاني وتجسد قصة واقعية
تخوض الفنانة المصرية ياسمين صبري موسم دراما رمضان 2025 بمسلسل عنوانه "ضل حيطة" بعدما كان يحمل اسم "الأميرة" منذ بدء تصويره قبل عدة أيام، نظراً لتشابه الاسم مع أعمال فنية أخرى مكررة عرضت في السابق.
وتجسد ياسمين صبري في المسلسل الرمضاني دور محامية، والعمل مأخوذ عن قصة حقيقية، تدور أحداثها في القاهرة في إطار اجتماعي.
ومسلسل "ضل حيطة"، مكوّن من 30 حلقة، ومن تأليف محمد سيد بشير، وإخراج إبراهيم فخر، وإنتاج مها سليم، ويواصل فريق العمل اختيار أبطال العمل.
ويشارك ياسمين في المسلسل حتى الآن أحمد فؤاد سليم، حيث يجسد دور والد ياسمين، فيما تقوم سلوى عثمان بدور والدتها.
وتستعد ياسمين للبدء بتصوير أحدث أعمالها السينمائية، فيلم "المشروع" بالاشتراك مع الفنان كريم عبدالعزيز والمخرج بيتر ميمي.
يُذكر أن ياسمين صبري شاركت في موسم رمضان 2024 ببطولة مسلسل "رحيل".
وعرض لها مؤخراً في دور السينما فيلم أبو نسب الذي جمعها بالنجم محمد إمام للمرة الثالثة فى السينما.
“الهوية والجنسية”: مهلة تصحيح أوضاع المخالفين تشمل المتواجدين داخل الدولة فقط