"حقنة أنسولين".. !!

أخرج الأستاذ صابر الموظف بشركة العطور ومستلزمات التجميل تليفونه الصغير القديم ماركة نوكيا من جيبه ليرد، وكان المتصل "جلال" بيه مديرهُ المُباشِر في العمل:

- أفندم يا سعادة البيه..

* إيه يا أستاذ صابر إنت إتاخرت ليه؟..

- معلش يا بيه أصل.. .

* أصل إيه يا صابر. الزملاء كلهم هنا والباشا الكبير هايزعل أوي لو ماجتش.

- ما هو..

* ما هو إيه وبتاع إيه يا راجل. يالا اشبط في أي ميكروباص وتعالى. مش معاك العنوان.. .

- معايا يا بيه بس لو حضرتك تسم.. .

* اسمع إنت يا صابر. يالا ماتضيعش وقت. إنت عارف إن دا فرح بنت الباشا الوحيدة. يعني أول فرحته. لا دي فرحته الوحيدة والراجل مزقطط على الآخر، وعامل الفرح في أفخم قاعة في البلد، وبعدين مفيش فرصة تقابله وتبارك له لأنه هياخد العيلة كلها بعد الفرح ورايحين الساحل الشمالي.

- معلش يا بيه اسمعني أصلي مش هاقدر ٱجي الفرح..

* بتقول إيه يا صابر. مش هتقدر تيجي ده إيه يا راجل متزعلش الباشا أُمال. بأقولك المكان هنا تُحفَة تُحفَة بجَد.. القاعة أسطورية.. عارف يعني إيه أسطورية ههههه يعني عمرك ماشوفت ولا هاتشوف زيها؟. غير بأه الفنانين الجامدين أوي السوبر ستار هههه.. .وما أقولكش على البوفيه يعني تقدر تقول الليلة دي حسب مانا شايف مكلفة مش أقل من نص مليون جنيه هههههه عقبال فرح بنتك.

- ربنا يفرحهم ويتم لهم بخير.. بس أنا مقدرش آجي لإني في المستشفى باستلم جثة بنتي..

* بتقول إيه يا صابر.. جثة إيه وبنتك مين.. ؟

- (صابر باكيًا).. بنتي "مُهْجَة" يا بيه. بنتي اللي ماتت ومعرفوش يسعفوها علشان المستشفى بتاعة الحكومة مفهاش حُقنة أنسولين. ولما اتصرَّفنا وجبناها كانت.. .

* لا حول ولا قوة إلا بالله.. البقاء لله يا صابر. شِد حِيلَك.

المصدر: الأسبوع