يا حبابْ رُوْحِكْ حَبَابَا…!

يا حبابْ رُوْحِكْ حَبَابَا...!

شوِقِي ليك امتدَّ في صمت المكان
ورفرفت روحي الشَّجِيَّه
تنادي لي بُستان حنان
يا شَجِيرة الدّرْ، عميق شلال محبَّه
تضوّي في قلب الزَّمان
شوقِي ليك امتدَّ في صمت المكان
***
شوقِي ليك امتدَّ في صمت المكان
واحتدَّ زي نار المَسِيْد
الفاضحه لي سرَّ الصَّبابه
تضَوِّي في قلبَاً مِنَوِّرْ رقَّه
زي روح الرَّبابه
تْضَوِّي في قلبَاً يِشَابِي
لي شمس الكمال الرَّاقْصَه
فيكِ بِتْوَهَّجْ شَبَابَا
ويا حَبَابِكْ
يا صفية النَّفْسِ
يا حقُولْ خيراً بيَوهِبْ
لي غُنا الغيمْ الشَّفِيْفْ
طلاقة السِّرْ الْبِدَفِّقْ
فينِي لي المَطَرْ الجَّمِيْلْ
الصَّابِّي زي نَبْعَاً نَِبيْلْ
ويا حَبَابِكْ
وزِهور طيبْتِكْ المغْسُولَه
بي ندى الغُنْيَاتْ حبابَا
ويا حبَابْ رُوحَاً رِحَابَا
بي الصَّفَا الحالِمْ تَبَارِكْنِي وحبَابَا
ويا حَبَابْ رُوْحَاً
بي طُهُرْ خَيْرَا ْبتَضَوِّيْنِي وحَبَابَا
ويا حَبَابْ رُوْحِكْ حبَابَا.

.!
يا حَبَابْ رُوحِكْ حَبَابَا..!

 

الخميس، 19\3\1981م،
إبراهيم جعفر.

* من مجموعة "كمانات الأغاني"، من مجموعة قصائدي المسماة "كمانات الأغاني"- الطبعة الأولى- طبعة محدودة (100 نسخة فقط)- المملكة المتحدة- 2009م- الإشراف الفني: طارق أحمد أبوبكر...:

khalifa618@yahoo.co.uk  

المصدر: سودانايل