مدبولي عن أسعار البنزين والسولار: تراكم الأعباء على الدولة يجبرنا على الزيادة

كتب- محمد عمارة وأحمد السعداوي:
قال الدكتور مصطفى مدبولي، رئيس مجلس الوزراء، إن أهم شيء اليوم هو أن نظل مدركين لحجم التحدي الكبير جدًّا الذي تواجهه الدولة المصرية من الخارج قبل الداخل؛ لأنه يؤثر جدًّا.

وأضاف مدبولي، خلال مؤتمر صحفي مع عدد من الإعلاميين ورؤساء التحرير، اليوم الثلاثاء: وأكيد أنتم متابعون مدى انشغال الرئيس بالملفات الخارجية، وتواصله مع الرؤساء وحكومات العالم، احنا ماشيين على حد السيف، دي أكثر منطقة ملتهبة في العالم.

وتابع مدبولي: كيف نحقق ريادة مصر؟ ودي حاجة مش كلام، ده واقع، مصر لها ثقل معين، مهما كانت أزماتنا وتعثراتنا، بيتعمل لينا حساب، بنبقى حريصين في كل قراراتنا، ازاي نوازن ونحقق حماية أمن مصر القومي، أي إجراء بناخده لازم نقيس رد فعل القوى العظمى وتداعيات رد الفعل على الإقليم.

واستكمل رئيس الوزراء: أحيانًا بنسمع إزاي نسكت على ملفات معينة زي المياه، أي رد فعل بيكون البداية مش النهاية؛ أي رد فعل بشكل حاد لازم ناخد بالنا، القرار بيكون فيه سيناريوهات كبيرة جدًّا؛ أهمها الحفاظ على الأمن القومي، وأهم حاجة سياسة حسن الجوار.

وقال مدبولي: الذي يهمني النهارده، ويمكن أنا باتابع الكلام اللي بيتقال ازاي الحكومة تكسب ثقة المواطن، وشُفت بعض المقالات، وأنا في تقديري مفيش حكومة بتبقى عايزة تاخد قرارات تنتقص من شعبيتها في الشارع، قرارات تحريك الأسعار بيكون آخر حاجة عايزين نعملها، أحيانًا بناخد قرارات ونرجئ ده لو عندي مساحة إننا نتحمل، بناخد الإجراءات ده وعملنا ده..

وتابع رئيس الحكومة: وكنا على أمل الأزمات تخلص، كنا بنرجئ القرارات لبضعة أشهر ونلاقي الأمور تزداد تعقيدًا، تراكم الأعباء على الدولة بيجبرها، مش قادرة تستمر في هذا الوضع، بنزود بعض أسعار السلع والخدمات، وبنتحمل جزءًا منه؛ لكن بامرر جزءًا منه على المواطن، زي ما حصل في أسعار المواد البترولية.

وأضاف مدبولي: الرقم كل يوم بيعدي على مصر، الدعم بتاع المواد البترولية 450 مليون جنيه يوميًّا، ده الدعم، مش تكلفة المواد، طب أنا كدولة عندي قدرات لده، وإلى متى؟ الدعم ده خلانا بدل ما ننفق على حاجات تانية تهم المواطن، اضطررت بدل ما أنفق على صحة وتعليم وبنية أساسية، اضطررت أقلل ده عشان الدعم، طب الدعم ده بيروح للمستفيد؟ لما وصلنا في 2021 إن ماكانش فيه دعم للبترول غير البوتاجاز، ده اللي مكَّن مصر تعمل مشروع حياة كريمة، بتبقى دي التوازنات، كل ما أزود الدعم كل ما هاقلِّل الصرف على الخدمات.

المصدر: مصراوي