بـ«مزمار بلدي».. طلاب الأدبي وعلمي علوم يودعون امتحانات الثانوية العامة

على أنغام المزمار، احتفل طلاب الثانوية العامة بمحافظة كفر الشيخ، بشعبتي «علمي علوم» و«أدبي»، بختام ماراثون امتحانات «الدور الأول»، وأطلقوا الألعاب النارية عقب خروجهم من اللجان، ودخل بعض الطلاب في وصلات رقص فيما بينهم، معبرين عن بالغ سعادتهم بالانتهاء من الثانوية العامة.

طالب: مش مصدق نفسي إني خلصت امتحانات

«حقيقي مش مصدق نفسي إني خلصت امتحانات، سنة كاملة من التعب والأرق والإرهاق خلصت وإنّ شاء الله ربنا يكافئني وأجيب المجموع اللي نفسي فيه وأدخل الكلية اللي بحلم بيها»، هكذا أعرب أحمد محمد نمور، أحد طلاب الثانوية العامة بكفر الشيخ، شعبة «علمي علوم»، عن بالغ سعادته بانتهاء ماراثون امتحانات الثانوية العامة.

منذ عام كامل وينتظر أحمد إيهاب سليت، أحد طلاب الثانوية العامة بكفر الشيخ، شعبة «علمي علوم»، هذا اليوم من أجل الشعور بالارتياح وفقاً له: «كنت منتظر اليوم ده بفارغ الصبر لأني حقيقي تعبت طول السنة، والثانوية العامة مش سهلة، وفيها ضغط كبير لأن الواحد بيكون قدامه هدف عايز يوصل له، وإنّ شاء الله أجيب مجموع عالي يدخلني الكلية اللي نفسي فيها عشان أفرح أنا وأسرتي».

طالبة توزع الشيكولاتة على زميلاتها عقب انتهاء ماراثون امتحانات الثانوية العامة

حرصت عبير مصطفى، أحد طلاب الثانوية العامة بكفر الشيخ، شعبة «علمي علوم»، على توزيع الشيكولاتة على زميلاتها عقب انتهاء ماراثون امتحانات الثانوية العامة: «فرحانة أوي إني حصلت امتحانات، ومش مصدقة نفسي، وبحلم بكلية الطب، وراضية جداً باللي ربنا هيبعته لأني عملت اللي عليا طول السنة».

يستعد بعض طلاب الثانوية العامة للتوجه إلى مصيف بلطيم عقب انتهاء ماراثون امتحانات الثانوية العامة ومنهم إبراهيم محمد الصاوي، أحد طلاب الثانوية العامة بكفر الشيخ، شعبة «أدبي»: «هنطلع أنا وأصحابي على مصيف بلطيم عشان نغير جو وننسى الامتحانات، وكمان عشان نستعد لإعلان النتيجة، وبإذن الله خير».

طالب: حقيقي مش قادر أوصف مدى سعادتي بانتهاء الامتحانات

يخطط أحمد أشرف عبد المنعم، أحد طلاب الثانوية العامة بكفر الشيخ، شعبة «أدبي»، إلى ممارسة الرياضة والنزول إلى الجيم عقب انتهاء ماراثون امتحانات الثانوية العامة: «ناوي أنزل جيم خلال الفترة الجاية لأن الامتحانات كانت واخدة كل وقتي، وحقيقي مش قادر أوصف مدى سعادتي بانتهاء الامتحانات، وربنا يفرحني أنا وكل أصحابي وزمايلي وكل واحد فينا يدخل الكلية اللي بيحلم بيها».

الفسيخ احتفال من نوع خاص حرصت أسرة منى علاء، إحدي طالبات الثانوية العامة بكفر الشيخ، شعبة «أدبي» على مكافئتها به عقب انتهاء ماراثون امتحانات الثانوية العامة: «أسرتي احتفلت معايا بانتهاء امتحانات الثانوية العامة بالفسيخ لأنهم عارفين إني بحبه، ونفسي أجيب مجموع حلو، وأدخل كلية تفرح أسرتي قبل ما تفرحني أنا شخصياً».

 

المصدر: الوطن