أهلين بالرفاه والبنين ، وعرس الهنا أسبوع

أهلين بالرفاه والبنين ، و #عرس_الهنا_أسبوع

د. #حسام_عودات

من أول ما يخطب الواحد ، بتبلش التهاني والتبريكات ، وكلها بتنتهي بعبارة : عقبال الفرحة الكبرى

ومش عارف شو هالفرحة الكبرى لزوجين على وشك استلام الكوبونات ، زي ما بقول يوسف غيشان

مقالات ذات صلة امرأة اخرى 2024/06/14

لحد هون الأمور طبيعية

بعد الزفاف مباشرة ، بصير عنوان المباركات ينتهي بعبارة : بالرفاه والبنين ، مع إنه لغويا لازم تكون بالرفاء والبنين

ما علينا

يا جماعة الخير خلوا العرسان يعيشوا حياتهم سنة أو سنتين ، وبعدين ندعيلهم بالذرية الصالحة

والأسئلة اللي من نوع حوشتوا إشي ؟ فحصتوا ؟

حللتوا ؟ بتبلش من أول شهر

حرام والله يا ناس ، هاي لازم تكون حياة سعيدة، مش مشروع تكاثر

مهو مش معقول من أول شهرين بعد الزواج يبلش الوحام ، والإستفراغ ، وبتبطل الست تطيق ريحة العطور ، ولا حتى جوزها

وبعد ما تقوم بالسلامة ، كل جهدها وحياتها للمولود الجديد

وبعدين سلسلة الفقس المتتابع بتبلش

يعني فعليا آدم الأردني ما بعيش حياة زوجية إلا شهرين ، وبقية العمر بتكون حواء أم أولاده وليست زوجته ، لإنه الست من أول حمل حتى تختير ، رايحة تقضي العمر بلشة بالأولاد ، ولاحقا بالأحفاد

وطبعا كل أواعي العرس لاحقا بظلن معلقات بالخزانة للأبد ، كونه بعد الحمل رايح يزيد الوزن ، وما برجع ينزل

وليش مستعجلين عالخلفة ، بلكي اذا ما استعجلوا بخلفة صلاح الدين ، يكتشف العرسان إنهم مش مناسبين لبعض ، وهيك ممكن ينفصلوا بدون ما يكون عندهم أطفال ويصيروا ضحايا سوء الإختيار ، وانتوا عارفين إنه البلد مش ناقصه عاهات

كل تكاليف العرس ، وشقا العمر لاحقا عند آدم ، وكل حياة حواء وتعبها مع الأبناء ، مقابل شهرين زواج ،

وطبعا خلال هذول الشهرين ، بمضوها يستقبلوا بالناس اللي جاية تنقط

ومصاري النقوط يا دوب تغطي مصاريف الضيافة ،

وآخر نص ساعة بسهرة النقوط بكون العريس الجديد غفيان على الكنباية ، لإنه بعده ما ارتاح من تحضيرات وحفلة العرس

وهيك بتصفي الحياة الزوجية للنشمي الأردني بس أسبوع ، وبعدها لطميات لبقية العمر 

غيروا هالعادات ، وخلوا النقوط عالمحافظ الإلكترونية ، بدل ما تروح إجازة العريس وهو يستقبل ويودع

وهيك بكون العريس وفر ثمن أربع اسطوانات غاز مدعومة بجلدة الأعذار في رفع الأوكتان

طابت أوقاتكم

.

المصدر: سواليف