ارجع يا زمان (1)

اشتقت كثيرًا إلى طفولتي وصباي، والأيام الخالية من المسئولية، اشتقت كثيرا كثيرا كثيرا لدلع ماماتي، وصوتها، وحنيتها.

نفسي الزمن يرجع لورا، حياة بسيطة هادية ممتعة، أرجع من المدرسة، ألاقى ماما في استقبالي، والأكل جاهز، وأحكي لها كل اللي حصل خلال يومي برة البيت، ونقعد سوا نتفرج على التليفزيون اللى مفيهوش إلا القنوات الأولى والتانية والخامسة - الخامسة يعني قناة الإسكندرية - وكان فيه الثالثة لسكان القاهرة والرابعة لسكان مدن القناة لكن طبعا إرسالها لا يصل إلا للمدن دي - وبعد المغرب يرن جرس التليفون، أجري عشان أرد بسرعة، أسمع صوت تيته اللى كله حنية وطمأنينة، وأنادي ماما عشان تكلمها، فتقوللى هاتي التليفون، وأشيل سبت التليفون المعدن المزين بالدانتيل، وأتذمر زي كل يوم من كعبلة السلك الطويل (مين اللى كعبل السلك كده؟!) لغاية ما أنجح في المهمة الصعبة وأناول ماما التليفون، فتتكلم ساعة وأكتر، وأنا قاعدة جنبها مستمتعة بالتدخل أحيانا في كلامها!! وتخلص مكالمة تيته وتتصل بخالاتي وكل مكالمة تستغرق وقتا طويلا لتبادل الأخبار والحكايات، من غير ما الشبكة تقطع ولا الصوت يختفى ولا تيجي مكالمة تانية على الويتنج.

يا سلام على متعة المكالمات العائلية اليومية الطويلة في التليفون الأرضي الرمادي أبو قرص وسلك، قبل ما هيئة التليفونات تتطور وتعمله بزراير ورمادي برضه!! ولما ظهر التليفون اللاسلكي كان حاجة مذهلة، اختراع لا يتصوره عقل، واتفقت أنا وأخواتي، وقدمناه هدية لماما عشان تعرف تتكلم في أي مكان في البيت من غير ما يتحكم فيها طول سلك التليفون المتكعبل دايما، وأيامها انتشرت شائعة عجيبة أن اللاسلكي ممنوع، ولو الشركة اكتشفته في أي بيت هتقطع الخط وتبلغ البوليس، مش قادرة أفهم ليه كانت الناس مصدقة الكلام ده! كأنه لاسلكي للتجسس مثلا!! أعتقد أنها انعكاس لحالة الخوف من كل اختراع جديد!!

وبالرغم من كده اشترينا التليفون اللاسلكي لماما، وفرحت به جدا، ويا سلام لما تكون في المطبخ، وحد يتصل بها، فأناولها اللاسلكي بكل سهولة وأحس إني عملت إنجاز عظيم باقتراح شرائه.

والذكريات لا تنتهي..

المصدر: الأسبوع