حكايات رمضان| معتز إينو يكشف عن هدفه الأغلى.. والمسلسلات المفضلة له

في شهر رمضان الكريم، يكون هناك عادات وتقاليد خاصة فيما يتعلق بالاستعداد لشهر الخير، فإن معظم نجوم الرياضة يعتمدون على هذة الطقوس والتقاليد في شهر القرآن.

حرصت بوابة «الأسبوع» على معرفة طقوس أبطالنا الرياضيين في مختلف الألعاب خلال الشهر المعظم.

واليوم يحكى لنا معتز إينو نجم النادى الأهلي ومنتخب مصر السابق، عن استعداداته وتفاصيل يومه خلال شهر رمضان الكريم.

تفاصيل يومك سواء قبل الإفطار أو بعده؟

قبل الفطار بالنسبة ليا صلاة وقراءة القرآن الكريم، وخاصة أن الواحد طول السنة بيبقى بعيد شوية عن قراءة القرآن تحديدا، فبحاول أعوض ده فى الشهر الكريم وبحاول أقرأ جزء أو اتنين يوميا قبل الفطار وبعد الفطار وصلاة العشاء والتراويح بقعد مع صحابى على القهوة فى حلوان نضحك ونهزر ونلعب طاولة.

هل تهتم بالأعمال الرمضانية أم لا؟

بحب المسلسلات بتاعة محمد رمضان والسنة اللى فاتت كنت فى ليبيا ماسك الأخضر الليبي مع كابتن عبد الحميد بسيونى وكنت بتفرج على جعفر العمدة.. السنادى مش متابع حاجة وممكن صدفة اتفرج لو الولاد مشغلين مسلسل أو برنامج قدامي.

ما هي الأكلات التي تفضلها في رمضان؟

بحب المكرونة بالشاميل والبوفتيك والحمام، وفى الحلويات بحب القطايف والكنافة.

ما المواقف التي لا تنسى ودائما في ذاكرتك في شهر رمضان؟

في أحد سفرياتي مع النادى الأهلى فى جنوب إفريقيا كنا بنلعب فى رمضان والرطوبة كانت عالية جدا ومكناش قادرين ناخد نفسنا وعلى الرغم من التعب كنت أنا وزمايلى بنضحك على بعض من مناظرنا ووشنا الشاحب حقيقى كانت من أصعب المباريات اللى عدت عليا.

ما النصيحة التي توجهها للشباب في شهر رمضان؟

شهر رمضان شهر عبادة لازم نهتم فيه بالصلاة وقراءة القرآن الكريم علشان صيامنا يتقبل ومش يبقى مجرد صيام عن الأكل فقط، ونحاول نصلى فى المساجد وبقول نصيحة لكل الناس وأولهم ولادى حاول تقرب من ربنا بدرى لو كنت بعيد لأنك فى الآخر هترجع لربنا سبحانه وتعالى فكل متقرب بدرى كل مهترتاح.

وبالنسبة للصلاة ده شئ مهم وأساسي سواء في رمضان أو غيره.. فلازم نهتم بكل ده ومنسمحش للمسلسلات والبرامج وغيرها تأثر على الشهر كريم وروحانياته.

هل طقوسك في الماضي وأنت لاعب تغيرت عن الوضع الحالى أم لا؟

طقوس رمضان لم تتغير بالنسبة ليا ولكن اللى أقدر أقوله أن زمان وأنا لاعب كان فى قيود مقدرش أخرج مع صحابى براحتى مقدرش أسهر حتى الأكل مكنتش بعرف أكل زي منا حابب لأن كان دايما بيبقى عندنا تدريب بعد الفطار فكنت أكل حاجة خفيفة جدا، بجانب كنت بحافظ على الوزن.

أما الآن فى حرية ووقت سواء أني أقعد مع أسرتي أو أخرج وأسهر مع أصحابي، بجانب الأكل خلاص بقى فى حرية باكل في أي وقت وبأى كمية.

ما هي المباراة التي ترتبط فى ذهنك دائما بشهر رمضان الكريم ولا تنساها؟

كانت مباراة قمة بين الأهلي والزمالك وكانت أول ظهور ليا وظهرت بمستوى رائع ومستر جوزيه وقتها أشاد بي جدا جدا، وكان مبسوط من أدائي وكسبنا المباراة الحمد الله.

وعن أغلى أهدافي كان هدفى فى عبد الواحد السيد أمام نادى الزمالك فى بطولة السوبر المصرى وكسبنا 0/2، وتوجنا بالبطولة والصقر أحمد أحسن كان أحرز الهدف الأول.

المصدر: الأسبوع