بعد حصوله على المؤبد.. ننشر أقوال المتهم بقتل نجل عمه بسبب 4 آلاف جنيه
تاريخ النشر: 2nd, April 2024 GMT
قضت محكمة جنايات جنوب الجيزة، بمعاقبة سائق بالسجن المؤبد لاتهامه بقتل ابن عمه بسبب خلافات مالية وشكه في سرقة أمواله من شقته بالمنيب.
حصل موقع "الفجر" على أقوال المتهم "علاء.ح.ح "31 سنة سائق توكتوك، المتهم بقتل ابن عمه داخل أرض زراعية بمنطقة المنيب.
وفي السطور التالية سنعرض أقوال المتهم في تحقيقات النيابة العامة:
س: ما تفصيلات اقرارك ؟
اللي حصل اني شكيت في ابن عمي "سيد محمد حسن"، إنه سرق من شقتي مبلغ 4000 الاف جنيه، ولما واجهته بالكلام ده امبارح نحو الساعة 8:30 الصبح طلعتله شقته وخبطت عليه، ولما فتحلي قولتله فين فلوسي راح زعقلي وشد معايا في الكلام وقالي انا مختش منك حاجه، وبعدها قالي تعال ننزل الارض الفاضية اللي جنب البيت علشان نتكلم هناك بعيد عن البيت وعلشان محدش يسمع الخناقة اللي بينا، وكنت ماسك في ايدي المطواه القرن غزال بتاعتي في ايدي ساعتها بس مفتحتهاش وفعلًا نزلت انا وهو وروحنا الأرض الفاضية اللي جنب البيت ولما دخلنا الأرض فضلت اقوله فين الفلوس مكنش راضي يقولي إنه سرقها.
وتابع المتهم: كان عاوز يقول ليا حاجه لحد ما شدينا في الكلام مع بعض وراح مسكنا في هدوم بعض بالايدي وراح ضربني بازازة مكسورة جابها من علي الارض في وشي واتعورت جنب عيني الشمال خربوش بسيط، روحت انا فتحت المطواه اللي كانت في ايدي وروحت ضربته بيها في صدره راح سايبني وقالي عورتني يا علاء ولقيت دم نازل من نص صدره بالظبط وقعد يطوح شوية ويشتمني وانا واقف مذهول من اللي حصل، وسيبته في مكانه ومشيت وطلعت على شقتي ولما دخلت لقيت مراتي قاعده وشافتني وفي ايدي المطواه وبتقولي في ايه قولتلها انا ضربت علاء ابن عمي وعورته في صدره وهو هناك في الأرض، راحت قالتلي انا هنزل اشوفه حصله ايه ونوديه المستشفي رحت نازل انا وهي ووقفت توكتوك معدي في الشارع معرفش اسم السواق حتي وركبت معاه ومراتي جت ورايا علي رجليها جري وروحت المكان اللي فيه علاء ( الـ الأرض الزراعية).
واستكمل: لقيته مغمي عليه وشيلته وحطيته في التوك توك لوحدي وسواق التوكتوك قالي هو ايه اللي حصل وماله قولتله معرفش ده ابن عمي وهنوديه المستشفي وساعتها رحت رامي المطواه فيا الارض الزراعية من غير ما حد ياخد باله، وفعلًا حطيته في التوك توك ومراتي جت ورايا وركبت التوك توك وطلعت علي بيت اخو علاء اللي هو اسمه ايمن محمد حسن، وناديت عليه وقولتله الحق اخوك لقيناه متعور ولما سألني مين إلى عوره قولتله معرفش وخدناه كلنا وطلعنا بيه علي مستشفي ام المصريين العام، وهناك قالولنا إنه علاء مات بقاله اكثر من ربع ساعة والحكومة حجزتني هناك والمباحث جت خدتني من المستشفي وخدوني علي القسم وهناك حكيتلهم علي كل اللي حصل وجابوني علي هنا انهارده.
س: وما سبب ومناسبة تواجدك بالزمان والمكان سالفي الذكر ؟
احنا روحنا الأرض الزراعية عشان اوصل معاه فين فلوسي إلى شاكك إنه سرقها
س: ولما ساورتك الشكوك تجاه المجني عليه في سرقة مالك ؟
عشان مراتي قالت ليا إنه ا شافته وهو طالع من الشقه وانا مسافر
س: وما مدي رؤيتها للنقود حوزته ؟
لا هي مشافتش الفلوس في ايده
س: وكيف تمكن المجني عليه من الدلوف لشقتك ؟
معرفش هو دخل ازاي
س: كيف نمي علمك بتواجد المتوفي إلى رحمة مولاه بمسكنه آنذاك ؟
علشان هو قاعد معايا في نفس العمارة وهو قاعد في الشقه اللي في الدور اللي فوقي وهو ابن عمي
وصاحبي وبنقعد مع بعض على طول وعارف إنه هو في شقته
المصدر: بوابة الفجر
كلمات دلالية: محكمة جنايات جنايات جنوب الجيزة قتل ابن عمه خلافات مالية سرقة أمواله المنيب اللی حصل فی ایدی
إقرأ أيضاً:
خاص| "دورنا عليه في كاميرات الطريق".. نص أقوال والد سائق أوسيم ضحية القتل على يد صديقه لسرقة الأتوبيس
تواصل بوابة "الفجر" نشر نص تحقيقات القضية رقم 5070 لسنة 2024، في قتل الشاب مصطفى سعيد محمود على يد سائق "محمد أنور سنوسي" وحماته "نحمده جاد" لسرقة السيارة الخاصة به (ميكروباص)، بعد استدراجه من منطقة أوسيم لمدينة 6 أكتوبر، وتخلص من جثته بجوار الطريق الدائري الأوسطي بأكتوبر.
وننشر أقوال والد الضحية "مصطفى" بعد خنقه لسرقة الأتوبيس الخاص به.مااسمك؟ وعملك؟
ج.سعيد محمود عبد المقصود منصور، 64 عامًا، من الأبعدية - مركز أوسيم - الجيزة، وبشتغل رئيس حرس الشركة المصرية لنقل الكهرباء بالمعاش
س: ما صلتك بالمتوفي إلى رحمة مولاه / مصطفى سعيد محمود عبد المقصود؟
ج: هو ابني.
س: وما هي طبيعة عمله تحديدًا؟
ج: هو شغال سائق على أتوبيس مع شركة الشرقية للدخان، بيوصل الموظفين في ثلاث ورديات.
س: ما معلوماتك بشأن الواقعة محل التحقيق؟
ج: اللي حصل إن مصطفى كان قاعد في بيته واتعشى وخرج خد الأتوبيس وطلع على الوردية بتاعته، وبعدين الساعة جت 2 بليل ولقيته لسه مرجعش، قعدت اتصل بيه على التليفون يديني مغلق، وبعدين لقيت ابن عمه بيكلمني بيقولي إن الشركة اتصلت بيه وبيقولولي إن مصطفى مجاش الوردية ولا شافوا العربية. وساعتها روحت على بيته عند مراته سألتها عليه قالتلي مجاش، وروحت على الجراج ملقتش الأتوبيس هناك
ولما سألت الناس اللي في الجراج قالولي إنه لسه مرجعش وإنه طلع بالأتوبيس لوحده. وظللت قاعد في الجراج مستنيه بس مجاش، وبعدين روحت قلت لأمه الواد مجاش، قالتلي تعالي نطلع على الطريق عشان نشوفه فين، وظللنا قاعدين على الطريق لحد الصبح، وبعدين لما مجاش روحت على قسم أوسيم، وقالولي مينفعش أعمل محضر تغيب غير بعد 24 ساعة، ودورت في الأقسام والمستشفيات، وقعدت ألف وأدور عليه في كل الأقسام ملقتش حاجة، وقعدت أدور عليه في الكاميرات اللي على طريق بتاع الوردية بتاعته موصلناش لحاجة عشان قالوا لازم قسم نيابة.
وبعدين رجعنا على قسم أوسيم، وظللنا هناك لحد ما بعتلونا على قسم أكتوبر، ولما جينا عرفنا إنه مات وهو ده كل اللي أعرفه.
الضحيةكواليس التحقيقات وحبس المتهمينقرر قاضي المعارضات، بمحكمة شمال الجيزة، استمرار حبس سائق لقتل زميله (سائق) بمساعدة خطيبته وحماته، لسرقة السيارة الميكروباص في أوسيم
اعترافات المتهمين
واعترف المتهم الرئيسي (سائق)، أنه اتفق مع خطيبته وحماته قتل المجني عليه لسرقة سيارته، وتغيير معالمها، فقام باستدراج الضحية لمدينة 6 أكتوبر، ثم أنهى حياته، بعد الاعتداء عليه، وتخلص من جثته بجوار الطريق الدائري الأوسطي، بمدينة 6 أكتوبر.
وعقب ارتكاب الجريمة حاولوا إخفاء السيارة الميكروباص بأحد الأماكن الخاصة بهم، تمهيدا لتغيير معالمه، ولكنهم خشيوا من القبض عليهم، وتركوا السيارة بأحد الشوارع
وكيل إمارة الرياض المساعد للحقوق يحضر حفل سفارة جمهورية اتحاد ميانمار بمناسبة اليوم الوطني لبلادها