بيومي فؤاد يشكو من الظلم: أبكي يومياً

متابعة بتجــرد: أكد الفنان بيومي فؤاد، أن الحزن يسيطر على حياته منذ أزمته الأخيرة، مؤكدا أن شعوره بالحزن لن ينتهي سوى ‏بعودة حقه، وأشار إلى أنه تلقى نصيحة بالتزام الصمت حتى ينسى الجمهور الأزمة، ولكنه أصر على الخروج لتوضيح حقيقة الموقف.

أضاف بيومي فؤاد في الجزء الثاني من حواره لبرنامج «حبر سري»، قائلا: الحزن هينتهى لما ربنا يجيبلي حقي أو الجمهور يسامحني أيهما أقرب، لكن أنا مش عايز الجمهور ‏يسامحني وهو مش مقتنع، مش عايز أصعب على الناس إطلاقا؛ لازم الجمهور يكون مقتنع.

‏

وواصل بيومي فؤاد مؤكدا رغبته في أن يفهم ‏الجمهور وجهة نظره قبل أن يسامحه، لافتا أن محبيه نصحوه بالصمت بعد فيديو الأزمة الأخير في المملكة العربية ‏السعودية، معقبا: كل اللي بيحبوني قالولي حط لسانك جوا بقك بعد الفيديو.

وتابع بيومي فؤاد: الشعب المصري شعب طيب شعب بيسامح.. والسوشيال ميديا مش هي الناس.‏

بيومي فؤاد رفض اتهامه بالوقوع في الخطأ في الفيديو الذي أثار الأزمة، وقال: أنا موافق لما أغلط هعترف بالغلط ‏وأحط لساني جوا بقي وأصبر وانتظر لغاية ما الناس تنسى وفعلا كم من حاجات كدا، لكن أنا اعتراضي أني مغلطتش ‏في الفيديو. ‏

وأوضح أن الاعتراضات الحالية ليست على عمله ولكن الانتقادات على حديثه في الفيديو، قائلا: دلوقتي ‏الاعتراض مش على شغلي، أنا شغلي وذهابي خلاني أخذت شوية شتيمة زي غيري، ‏والكلام كله عن الفيديو.‏

وأضاف أنه يرغب في شرح وجهة نظره حتى لو لم يسامح من قبل الجميع، قائلا: اللي مضايقني أن الناس هتنسى ‏وهي زعلانة، أنا مش عايز الناس تنسى وهي زعلانة، أنا عايز الناس تفهم، وبعدها يقرروا لو لسه زعلانين فوق ‏دماغي ولو كل اللي أنا قلته عبط فوق دماغي لكن أشرح وجهة نظري.‏

صرح الفنان بيومي فؤاد، أن أول من تواصل معه بعد أزمته الأخيرة مع الفنان محمد سلام؛ كان الدكتور مدحت العدل، ‏قائلا إنه كان يتلقى العديد من رسائل الدعم من أصدقائه على تطبيق واتساب محذرين إياه من الحزن والتعب.

أشار بيومي فؤاد إلى خوفه من ذكر أسماء أصدقائه الذين دعموه خوفًا من تعرضهم للهجوم، واعتبر بيومي فؤاد نفسه «وصمة» في الوقت الحالي طالبا السماح من الدكتور مدحت العدل لذكر اسمه، ‏قائلا: خايف أتكلم عنهم أجبلهم الكلام أنا وصمة دلوقتي، سامحني يا دكتور مدحت أني قلت اسمك عارفك جدع ‏ومبيهمكش.‏

ورد على تعليق الإعلامية أسما إبراهيم حول حقيقة شعوره بكونه «وصمة»، قائلاً: «بالنسبة للأخوة اللي ‏بيشتموني، لكن الحمد لله رب العالمين؛ أنا عارف بعمل إيه وده اللي دفعني أني أظهر».‏

و دخل بيومي فؤاد، في نوبة بكاء، خلال عرض صورة الفنان محمد سلام، قائلا: “ربنا معاك”.

ووجه بيومي فؤاد، رسالة لمحمد سلام، قال فيها: “بقوله إزاي متطلعش تدافع عننا؟ إزاي متطلعش تدافع عن محمد أنور وهو ترشيحك في المسرحية اللي عرضناها بالسعودية؟ أنا صدقتك في الفيديو جدا وأنت قلت لا نفاق ولا رياء وأنا وجهة نظري العبيطة علشان أنا راجل طيب مكنتش هتخسر حاجة إنك تطلع تقول أنا مقدرتش مش معنى إن أنور قدر وراح يحصل معاه كده يا جماعة خصوصا إنك طلعت دافعت عن أمير كرارة لما طلعت إشاعة كاذبة إنه مشاك من المسلسل بتاعه وأنت مش معاه، طلعت دافعت عن أحمد الجنايني لما طلعت إشاعة واتشتم بسلسفيل أهله طلعت دافعت ليه مطلعتش تدافع عن محمد أنور مش عني؟ كل يوم بسأل ليه مدافعتش عننا؟ ده اللي كنت مستنيه منك ورزقك على الله هي موتة ولا أكتر، العمر واحد والرب واحد يا أستاذ سلام”.

وأكمل: “العمر واحد والرب واحد لكل اللي شتمني وكل اللي فاهمني غلط أنا غلط بس راجل، وأطلع في كل برنامج أقول كده ومعاكم للاآخر”.

وتابع: “أعتذر لكل اللي زعلوا مني وبكرة تعرفوا الحقيقة، أعتذر لكل فريق مسرحية زواج اصطناعي علشان اتشتموا واتهانوا بسبب الفيديو بتاعي، باعتذر لمي عز الدين ودنيا سامي وإيمان السيد ومصطفى غريب، ومحمد محمدي وسليمان عيد ومحمد أنور، بس فيه بنات محترمات طالها شتيمة قذرة.

وأكد الفنان بيومي فؤاد: محصلش ضغط عليا علشان أقول الكلام اللي قولته على المسرح، وناس رفضوا أتكلم وقالوا ليه ومراتي أيضا رفضت، بس أنا صممت أتكلم لإني كنت مولع وصممت أكتر علشان محمد أنور”.

View this post on Instagram

A post shared by برنامج حبر سري (@hebrserry)

main 2024-03-30 Bitajarod

المصدر: بتجرد