حكايات رمضان| مشير حنفي يكشف عن طعامه المفضل.. والفنان الذي يشاهد مسلسلاته

في شهر رمضان الكريم، يكون هناك عادات وتقاليد خاصة فيما يتعلق بالاستعداد لشهر الخير، فإن معظم نجوم الرياضة يعتمدون على هذه الطقوس والتقاليد في شهر القرآن.

بوابة «الأسبوع» حرصت على معرفة طقوس أبطالنا الرياضيين في مختلف الألعاب خلال الشهر المعظم.

واليوم يحكى لنا مشير حنفى نجم النادى الأهلي ومنتخب مصر السابق، عن استعداداته وتفاصيل يومه خلال شهر رمضان الكريم.

تفاصيل يومك سواء قبل الإفطار أو بعده؟

قبل الإفطار قراءة القرآن الكريم وصلاة الظهر والعصر والتجهيز للفطار، وأنزل قبل آذان المغرب أجيب عصير وبعد الإفطار وصلاة التراويح أقعد مع أصحابي على القهوة نضحك ونهزر ونفتكر ذكرياتنا وبعد كدة كل واحد فينا يروح بيته ونبدأ التجهيز للسحور وصلاة الفجر.

هل تهتم بالأعمال الرمضانية أم لا؟

بتفرج مع أولادي على المسلسلات اللى بيحبوها ودايما بتكون لكريم عبد العزيز ومحمد رمضان.

ما هي الأكلات التي تفضلها في رمضان؟

بعشق الممبار وبحب الشوربة والكنافة.

ما المواقف التي لا تنسى ودائما في ذاكرتك فى شهر رمضان؟

الذكريات ولا عمرها هترجع تانى ولا عمرها هتتنسى، يعنى مثلا أنا كنت بحب الدورات الرمضانية اللى كانت بتتعمل بعد التراويح كان فيها إثارة ومتعة ومنافسة، وكان عندنا فرق تبع مراكز شباب عندنا فى المنطقة زى مركز شباب ناصر ومركز شباب إبراهيم بيه ومركز شباب الجلاوى كانوا دايما بيعملوا حالة حلوة عندنا فى المنطقة.

الدورات دي فعلا كانت بتمنع الشباب عندنا فى المنطقة، عن أي منكر أو سوء وكان اللى جاى ومش هيلعب بيجى علشان يتفرج ويستمتع بالمنافسات فبصراحة الدورات من أجمل الحاجات اللى مش بقدر انساها لكن للأسف حاليا مبقتش موجودة زى الأو.

ما النصيحة التي توجهها للشباب في شهر رمضان؟

شهر رمضان شهر روحانيات وشهر فيه فرصة كبيرة للقرب من الله وبنحاول على قد منقدر أننا ننفذ فروض ربنا بشكل صحيح على قد منقدر سواء صلاة أو صوم أو قراءة قرآن كريم.

وهذا لا يمنع أننا برده بعد منخلص فروض ربنا اللى مطلوبة مننا أننا نتفرج على المسلسلات والبرامج ولكن الهادفة مش اللى فيها أشياء تستدعي غض البصر ميبقاش بناخد حسنات من ناحية ونضيعها من ناحية تانية.

وكمان ممكن يتجمعوا مع بعض وقت السحور يتسحروا مع بعض ويضحكوا مع بعض ويهزروا وكدة، خاصة أن السحور مش بيبقى موجود غير شهر واحد فى السنة هو شهر رمضان الكريم.

هل طقوسك في الماضي وأنت لاعب تغيرت عن الوضع الحالى أم لا؟

نعم اتغيرت بشكل كبير.. زمان وأنا لاعب كنت بطولي وكنت بفطر خفيف وأصلي المغرب وبعدها بربع ساعة تقريبا أروح النادى علشان أتمرن وبعدها أروح على السحور وهكذا.

إنما دلوقتى الدنيا اتغيرت 180 درجة بقى عندى أسرة وأولاد وبحاول أتواجد معاهم أطول فترة ممكنة بجانب أن مبقاش في أي قيود عليا زى زمان وأنا لاعب.

ما هي المباراة التي ترتبط في ذهنك دائما بشهر رمضان الكريم ولا تنساها؟

مباراة نهائى كأس مصر بين الأهلي والزمالك موسم 93/92، وكسبنا الحمد الله 1/2، فى هذا التوقيت الزمالك كان مستواه ممتاز وإحنا كنا مركزين جدا جدا ومش حابين جمهور الأهلى يروح من الاستاد زعلان، وفعلا اتعاهدنا أننا نكسب ونفرح جمهورنا وبالفعل ربنا كرمنا وكسبنا الزمالك وأخدنا الكأس.

المصدر: الأسبوع