"كان بيدافع عن شرفه".. ننشر أقوال والدة سوداني متهم بقتل شقيقها ببولاق الدكرور| خاص

حصل موقع "الفجر" على أقوال "راندا.ع" سودانية صاحبة 38 عاما من عمرها، في تحقيقات النيابة العامة في واقعة مقتل شقيقها على يد نجلها الذي كان يدافع عن شقيقته من خاله الذي لم يكن في وعيه وفي حالة سكر.

س: ما معلوماتك بشأن الواقعة محل التحقيق؟

 أنا سمعت صوت بنتي "إخلاص" طالع من المطبخ وكانت بتزعق، روحت داخله على المطبخ جري أشوف فيه ايه، لقيت صاحب اخويا "طلال" اللي اسمه "عادل" واقف جنب بنتي في المطبخ، وأنا افتكرت إنه عمل حاجة غلط معاها لإنه كان سكران ساعتها، وبعدين روحت ماسكه فيه وبنتي كانت معايا روحت ضربه بالكف علي وشه ولقيت "هشام" من الصوت راح صاحي وجاي علينا وراح ماسك في الراجل وراح طرده برا الشقة، وبعدين هشام نزل بالراجل تحت علشان ميعملش فضايح في العمارة.

واستكملت: شوية لقيت طلال أخويا جاي علي بنتي وماسك سكينة في إيده، وراح خابط البنت بضهر السكينة على دراعها " بالخشبة"، وبعدين حاولت أحوش عن بنتي ومسكت في أخويا طلال، وطلبت منها تنزل تجري تنادي علي هشام علشان يطلع ويمسك أخويا طلال، وأول لما طلع هشام راح ماسك في إيد اخويا طلال واخد منه السكينة ورماها على الأرض وراح ماسكه وطرده برا باب الشقة، وبعدين فضل أخويا طلال يزعق ويعلي في صوته من برا وسمعت صوت تخبيط على الباب بحاجة كانت في إيده روحت فاتحه الباب، وجنبي هشام لقينا طلال ماسك في ايده حاجة معموله بالجبس.

وتابعت: راح هشام اخدها منه ورمها علي الأرض وكان طلال مش في وعية ساعتها، لإنه كان سكران وبيطوح، وبعدين شوية وسمعت صوت حد بيقول "اه" وبعدين راح هشام فاتح الباب ويشوف فيه ايه شوية وسمعت صوت هشام بينادي على بنتي "إخلاص" وبيقولها صحي "رامي" اللي هو اخويا وأول ما صحي راح شايل "طلال" مع "هشام" وبعدين خرجوه برا العمارة والناس طلبت الإسعاف وراحنا المستشفى.

حلف اليمين

س: متي وأين حدث ذلك؟

يوم الجمعة فجر يوم السبت الساعة واحدة ونص 

س: هل معتاد المجني عليه طلال عبد القادر تناول مواد مسكرة أو مخدرة؟ 

أيوة، هو بيشرب خمرة من ساعات ما كنا في السودان

أحالت النيابة العامة المتهم "هشام. أ" 19 سنة سوداني الجنسية، لمحكمة الجنايات المختصة بدائرة محكمة استئناف القاهرة، بعد أن وجهت إليه تهمة ضرب خاله حتى الموت، وذلك على خلفية التحقيقات في القضية رقم 10209 لسنة 2023 جنايات بولاق الدكرور.

وجاء في أمر إحالة أن المتهم قتل خاله المجني عليه "طلال. ع" مع سبق الإصرار والترصد، بأن دفعه من أعلى سلم فسقط على رأسه.

وكشف أمر الإحالة، أن المجني عليه كان في جلسة سكر مع صديق له واصطحبه مغيب العقل إلى شقة المتهم ليبيت لديهم.

المصدر: بوابة الفجر