نجوى فؤاد نادمة على دخول مجال الفن.. وهذا ما قالته عن صورها الجرية

متابعة بتجــرد: حلت الفنانة نجوى فؤاد، ضيفة على برنامج “حبر سري” الذي تقدمه الإعلامية أسما إبراهيم على قناة “القاهرة والناس” حيث كشفت للمرة الأولى عن العديد من الأسرار عن علاقتها بالوسط الفني، وندمها على أشياء فعلتها وأمنيتها في الفترة الحالية، بالإضافة إلى حديثها عن تفاصيل حياتها الشخصية، ومشوارها الفني.

وقالت النجمة المصرية في تصريحاتها بعفوية: “أنا بتمنى أروح لربنا وحيدة زي ما أنا، وأعيش حياة طبيعية مع ربنا”، مضيفة: “مش عايزة يتعملي عزاء، الناس بتكون مشغولة بالتلفونات ومش حاسين بالحزن، وأنا مش عايزة ده لنفسي”.

وأضافت: “هكتب في وصيتي يتبرعوا بأعضائي، الجسد شيء فاني، ولما أتبرع بأعضائي هيكون عمل كويس ليا بعد ما أروح لربنا، ولازم نؤمن إن الحياة لها نهاية”.

وعن أعمالها الفنية، قالت: “اشتغلت مع محمد السبكي في فيلم “حلاوة روح”، وطلبت فلوس أداني خمسة آلاف جنيه، لو بعتلي بوكية ورد كان أحسن”.

وأضافت: “أنا صارفة على يسرا ثلاثة ملايين جنيه في بدايتها، ونسيت حاجة اسمها نجوى فؤاد، وأنا قد كلامي ونص، ولما بتسمع إني مريضة أو بعيد عليها بفويس، ترد عليا تقولي وأنتي طيبة وإزي صحتك، ومبتسألش عليا في تعبي”.

وتابعت: “لو يسرا جت وإدتني الثلاثة مليون جنيه اللي صرفتهم عليها مش هاخدهم، أنا بحتاج لربنا مش بشر”.

وعن صورها الجريئة، قالت: ” انتقادات الناس على صوري الجريئة قدام الأهرامات كانت ليا، لأني بعارض اللبس العريان زيادة عن اللزوم اللي أضافوه لينا الروسيات والراقصات الجدد بقالي 15 سنة، واقترحت يتحط شيفون ويكون الممنوع المرغوب ويجذب النظر، والصورة كانت إعلان لوزارة السياحة علشان مصر”.

وتابعت: “في بعض الأقارب بدأوا يسألوا عليا علشان فات من عمري كتير، ولكن لعبهم على شونة ومفيش ورث ياخدوه، وأنا عديت بأزمات صحية كتير ومسألوش عليا”.

وأضافت: “بعاتب المنتج جمال العدل، ولما بكلمه مبيردش عليا وأوقات كتير بكون محتاجة له، وكلمته في بداية تعبي وعمل معايا واجب كبير”.

وعبرت عن ندمها من دخول الوسط الفني: “ضحيت أن يكون عندي أسرة وأولاد وأحفاد، كان هيبقى عندي حاجات كتير أوي أغلى من دلوقتي. أنا مش ندمانة على مشاهدي الجريئة ووقتها كان سني يسمح لها، إحنا جيل خربشنا كتير علشان نبقى نجوم، وجيل دلوقتي مبيتعبش وبياخدوا عشرة ملايين وإحنا خدنا عشرة ملاليم”.

واعترفت أن “أعلى أجر أخدته كان 8 آلاف جنيه. وأنا مقدرش أعمل دور تلميذة بفيونكات وأنا عندي 70 سنة”.

وتابعت “الست اللي تتعرض لخيانة تسيبه أيًا كان والرزق على الله، خلاص لما تضيع الثقة بيضيع معاها حاجات كتير”.

وأضافت: “أنا ظلمت نفسي في الـ 3 سنين اللي فاتوا، وكان المفروض أعمل حساب الزمن وأعمل حساب أني هتعب، مكانش عندي وعي بالحاجات دي”، مشددة على أنها “زعلانة من غادة عبد الرازق لأني كنت منتظرة مكالمة منها لأني بحبها أوي”.

وأضافت: “فيفي عبده عطاءة وبتسأل عليا وندمانة اني ماعرفتهاش من زمان، بأحاول أتصل بيها لكن تعبها خلاها تقفل تلفوناتها، واتصلت بي من دبي لتسألني إن كنت أحتاج شيئاً”.

main 2024-03-20 Bitajarod

المصدر: بتجرد