لمياء الأمير: "بقالي 3 سنين بشتغل ضيفة شرف.. وأشرف زكي لو مشي من النقابة هموت" (فيديو)

تحدثت الفنانة لمياء الأمير، عن قلة أعمالها الفنية خلال السنوات الماضية، بجانب الحديث عن الدكتور أشرف زكي نقيب المهن التمثيلية.

 

لمياء الأمير ضيفة برنامج "المنسي"

 

وقالت لمياء الأمير في لقائها مع الإعلامية إنجي هشام، في برنامج "المنسي"، المذاع عبر شاشة قناة "هي": أنا مش سبب في اختفائي، بيتعرض عليا أدوار كلها ضيفة شرف بقالي 3 سنين بشتغل ضيفة شرف، وأنا مستغربة وكنت في سنة من السنين كنت بعمل طرف تالت وكاريوكا ونيران صديقة، كنت بعمل في رمضانات اللي فاتوا كنت بعمل بالأربع مسلسلات، وقبل آخر 3 سنين كان في سنتين قاعدة فيهم مبشتغلش ومتسألنيش عن السبب لأن جيلي كله قاعد في البيت.

وتابعت: أنا اعتقد أن المخرجين كلهم شباب ومش عارفينا ولا اشتغلوا معانا ومش مهتميين، وأنا مبقاش عندي أمل في الوسط وعلشان مضايقش نفسي بقول خلاص اعتبري نفسك معتزلة، لو جه شغل تمام ولو مجاش خلاص، وأنا مبحبش أرفع التليفون على حد أبان أني قليلة وأخد فلوس قليلة وأتعامل بشكل مهين لأني أنا اللي بطلب".

 

وأضافت: “أنا ليا صحاب كتير ممثلين ومخرجين بقيت أبعت لهم في الأعياد علشان يفتكروني، لكن مستحيل أبعت لحد أني عايزة أشتغل، والدكتور أشرف زكي هو أحسن نقيب في الدنيا، وهو دفعتي في المعهد وصديق عزيز”.

 

كما روت لمياء الأمير موقفًا للدكتور أشرف زكي، قائلة: شركة إنتاج اتصلوا بيا وعايزني في مسلسل السنة اللي قبل اللي فاتت، وكنت هبقى ضيفة 3 أيام وهتكتب لوحدي على الشاشة، وقالولي رقم قولتله لو سمحت أقفل وجيب كومبارس مكاني، وقعدت أعيط بـ إنهيار، وأخويا قالي أنتي بتعيطي ليه متشتغليش، حسيت بعدم التقدير واتوجعت.

 

واختتمت: واتصلت بـ دكتور أشرف وأنا بعيط علشات أسأله ليه أخد ثمن أجري، وهو كلم الشركة وزود الأجر، وكنت عارفة أن في الفترة دي كل زملائي متنازلين، وروحت عملت العمل، وأنا بقول لأشرف زكي لو أنت مشيت من النقابة أنا ممكن أموت.

 

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.

 

 

المصدر: بوابة الفجر