تفاصيل اعترفات متهمة بقتل مسؤول يمني بالجيزة: «خدرناه علشان نسرقه»

حصل «الأسبوع» على اعترفات سهير عبد الحليم، 16 سنة ربة منزل، والمتهمة في قضية قتل المسئول اليمني بالجيزة، بعد صدور قرار من المحكمة بتأجيل محاكمة المتهمين بالقضية لجلسة 6 مارس المقبل للاطلاع على القضية.

تفاصيل اعترفات المتهمة بقتل المسئول اليمني

وقالت المتهمة في التحقيقات: «أنا كنت قاعدة أنا وعبد الرحمن - جوزي عرفي - عند أبويا في المنيب في الجيزة، ويوم الخميس جت دينا عندنا وهي أصلا أختي من أمي وصاحبها رمضان، ودخلوا قعدوا في الصالة ودينا قالتلي عايزاكي في حوار ورمضان قعد في الصالة لف سيجارة حشيش وقعد يشربها هو وأبويا، وعبده كان قاعد في الصالة التانية روحت أنا ناديت دينا ودخلنا الأوضة وقولتلها في ايه قالتلي فيه واحد صاحبي اتعرفت عليه وهنروح نفتشه، قولت لها مين ده قالتلي لا متعرفهوش ده سعودي لسه متعرفه عليه وقالت لي هنروح نحط له منوم ونفتشه ورمضان يستنانا في الشارع، قولتلها عبده مش هيرضى اروح لوحدي طلعنا من الأوضة رحنا لعبده أنا وهي وأنا ناديت رمضان».

وتابعت المتهمة بإنهاء حياة المسئول العسكري اليمني: «قالولي ساعتها ده واحد هيتحط له منوم وسألتهم المنوم ده هيعمل حاجة قالولي لا مش هيعمل، انتي بس خليكي معاها، قلتلهم خلاص هنروح أنا وعبده قالي ساعتها ماشي، والكلام كان قدام عبده وقلت لعبده وهو مكنش راضي لحد ما أقنعته إني هروح لوحدي لو مش جاي معايا، لحد ما اتفقنا إن احنا الأربعة نروح عشان نحط له المنوم ونفتشه، وناخد الحاجة اللي في الشقة ونزلنا احنا الأربعة وكانت الساعة 12 بالليل، واحنا ماشيين عشان نركب التوك توك دينا قالت هنروح عنده البيت أنا وهي، نحط له المنوم في أي حاجة يشربها عشان ينام، ورمضان وعبده هيبقوا واقفين تحت عشان ياخدوا مفاتيح العربية، ويمشوا بيها واحنا هنركب تاكسي ونمشي وراهم واتفقنا على كدة».

وأكملت المتهمة: «روحنا ركبنا توك توك لحد سلم المنيب، وسبنا عبده ورمضان ييجوا ورانا واحنا ركبنا تاكسي وبعد ما ركبنا دينا كلمت الراجل وادتهوني عشان مكنتش فاهمة حاجة، وقلت له ابعتلي على الواتس عشان مش فاهمة وبعت العنوان واللوكيشن، وبعتلنا فيديو ليه وهو داخل العمارة وبيضغط على الأسانسير الدور العاشر وبعدين التاكسي وصلنا ونزلنا جبنا سجاير من الكشك ورنينا عليه على الموبايل وقولناله الباب مقفول، قال أنا نازل لكم وفتح الباب وخدنا وطلعنا، ولما طلعنا قلعنا البلوزات التقيلة وقعدنا بالتي شيرتات الكات، وبنطلونات جينز وهو كان لابس بنطلون وبلوفر وقعدنا في الصالة، وكان حاطط ازازة ويسكي على الترابيزة وعصير وقعدنا شغلنا أغاني على التليفون ودينا قامت رقصت، وبعدين انا قمت رقصت وهو قام رقص معايا، وبعدها دينا قالت له عايزة تلج ودخلت المطبخ.

وأضافت المتهمة: «بعدها هو دخل ورا دينا المطبخ روحت طلعت المنوم وحطيته في الكوباية، وقلبت الكوباية بإيدي وهو خرج بالتلج هو ودينا وشرب الكوباية ودينا عملت نفسها بتشرب وبعدين هو صب ويسكي تاني في الكوباية، وقام دخل الأوضة دينا حطت منوم تاني في الكوباية وقلبتهم بصباعها وادتني كيس المنوم وهو شرب الكوباية وبعدها رمضان رن وكلمها وقفل، وبعدها داخ وقال أنا داخل أنام، ورمضان وعبده طلعوا بعدها الشقة».

اقرأ أيضاًلـ 6 مارس.. تأجيل محاكمة المتهمين بقتل المسؤول اليمني في الجيزة

وصول المتهمين بقتل شخص يمني الجنسية لحضور أولى جلسات محاكمتهم

المصدر: الأسبوع