أبرزها مراعاة الأيام الفاصلة بين المواد.. «أمهات مصر» تتلقى مقترحات أولياء الأمور حول جداول امتحانات الثانوية العامة

طرحت عبير أحمد، مؤسس اتحاد «أمهات مصر للنهوض بالتعليم»، وائتلاف أولياء الأمور، منشورا على أولياء الأمور قبل أيام قليلة من إعلان جداول امتحانات الثانوية العامة، للتعرف على مقترحاتهم حول مواعيد أيام المواد داخل جداول الامتحانات.

وتفاعل العديد من أولياء الأمور على صفحة اتحاد أمهات مصر للنهوض بالتعليم، وائتلاف أولياء الأمور، على فيسبوك، حيث قالت ولي أمر: «حابة أوضح إن بقالنا سنتين مفيش تكافؤ بين امتحان الجيرمان والفرنش والايطالي، دايما الجيرمان والإيطالي ييجي تقيل والفرنش أسهل بكتير، ومراعاه جدول علمي رياضة بيبقي الأيام الفاصلة بين المواد مش كافية».

وأضافت ولي أمر: «يا ريت يكون فيه مدة كافية بين كل مادة والتانية لا تقل عن 4 أو 5 أيام تكفي لمراجعة المادة، المناهج كبيرة جدا ومحتاجة وقت للمراجعة خصوصا المواد العلمية، وياريت يراعو الامتحانات يكون معظمها للطالب المتوسط و30% بس للطالب المتميز، مش العكس، زي ما حصل السنة اللي فاتت في الكيمياء والفيزيا والبايو، الامتحان كله كان للطالب المتميز مش عارفة حظ علمي علوم ليه كده.. الطلبة على قدها أوي مش عباقرة والله».

وطالبت ولي أمر أخرى: «نتمنى كمان مراعاة الأسئلة ونوعها وتكون مباشرة، يعني سيادة الوزير قال مفيش أسئله تعجزية ولا اختيارات تكون شبه بعض، ويا ريت الأساتذة الأفاضل اللي بيحطوا الامتحان يراعوا أن ده مستقبل أولاد وأولياء أمور بتتعب وتشقى، وأنه هيُسأل أمام الله يوم القيامة وربنا معاهم ويراضيهم إن شاء الله».

وأضافت ولي أمر أخرى: «ياريت بين المواد تكون أيام كافية للمراجعة ومدة الامتحان تزيد شوية، عشان الولاد يلحقوا يحلوا الامتحان بهدوء وبدون توتر، وتراعوا ربنا في تنوع الأسئلة بلاش أسئلة تعجيزية، وبخصوص علمى رياضة، مراعاة الفترة الزمنية للامتحان بما يناسب مع الأسئلة ومراعاة الفترة بين كل امتحان والآخر وربنا يوفقهم جميعا يارب».

المصدر: الأسبوع