لمن نقول نحن راجعين نحن ببساطه ما قصدنا نرجع للارض والوطن، نحن بنقصد نرجع الروح في الجسد

قالت الاختصاصية النفسية “إيثار التاي”: لمن نقول باذن الله حنرجع السودان، نحن ما قصدنا بس نرجع لحدود الوطن واحساس الانتماء وكينونتنا ومكان ميلادنا وبداية هويتنا .. لا نحن بنقصد اننا نرجع لشارع بيتنا البنمشي فيه وبنقيف نتونس مع ناس حلتنا لمن نتلاقه كل يوم صدفه في دخلتنا وفي مرقتنا، وعيالنا يلعبو في ارضهم، وخاتين قوانين نفسهم.

نحن بنقصد زياراتنا لصحباتنا ويفرجونا جددو شنو في بيوتهم وشققهم، والضحكة تملا الحته بذكرياتنا وجنون طفولتنا. نحن بنقصد لفة العيد على اهلنا، وريحة البخور في بيوت خالتنا، وضواقه الخبيز البكون هو ياهو زاتو وجابو من نفس الحته في كل بيوتنا، ولمن نكمل شيالة حلاوة البقرة وشاي المغرب في بيوت عماتنا، وتكون على قلبهم زي العسل، ما دي ارضنا ودى بيتنا ودي شيالتنا. وأضافت إيثار صلاح التاي – اختصاصي في الصحة والإرشاد النفسي، وذلك بحسب رصد محرر “النيلين” على شبكات التواصل الاجتماعي :نحن بنقصد الجزيرة، واي حته تانيه بنسميها البلد، واول ما ناجز نقوم جارين ليها، عشان نتلمى ونتونس وننسى زحمة الدنيا وهمومها. لمن نقول راجعين، بنقصد مشوار طويل بدا من الروضه لحدي تخرجنا من الجامعه، وبداية مشوار التوظيف وبعده تبدا تعافر في مشروعك الخاص لحدي تثبت اسمك في بلدك ووطنك وتبقى انت علم فيها بمجهودك وتعبك وعلمك. لمن نقول نحن راجعين، نحن ببساطه ما قصدنا نرجع للارض والوطن، نحن بنقصد نرجع الروح في الجسد. إيثار صلاح التاي
اختصاصي في الصحة والإرشاد النفسي رصد وتحرير – “النيلين”

المصدر: موقع النيلين