في العالم كله ما شفنا ولا سمعنا بي بشر زي الجنجويد… لا بعرفوا دين، لا رب، لا قيامة، لا حساب، لا قيادة

□ الجنجويد بعد ما أستباحو قري جنوب الجزيرة بأكملها، وسرقوا السيارات، والأموال، والذهب،
حالياً رجعوا بقلعوا في مخازن المواطنين من الذرة.
□ أي بيت في الجزيرة دي بكون فيهو مخزن صغير في البيت، فيهو المحصول بتاع حواشتو، وفيهو عرقوا وتعبوا.
□ خمسة شهور تلقاهو من ترعة لي أبوسته، وخامج الطين، عشان يسقي حواشتو، ويجيب ليهو عيش يأكلو.

□ قاليك الرباطة ديل بشيلو منهم بالقوة، وبشحنو بالجامبوهات.
□ والله في العالم كلو كللللو ما شفنا ولا سمعنا بي بشر زي الجنجويد ديل.
□ ياخي لا بعرفوا دين، لا رب، لا قيامة، لا حساب، لا قيادة،
بس شغال علي كيفو، خطط، أقتلد أنهب، أسلب، أسرق.
□ ياخ المواطن في ود شمعة، ولا الرميتاب، ولا ود الهندي، عندو خمسة شوالات عيش خاتيهم لي عيالو ياكل منهم كسرة، لا بعرف كيزان، لا بعرف جيش، وقاعد في بيتو، انت يا جنجويدي جايهو تقلع عيشو تحت تهديد السلاح ليه؟
□ مواطن الجزيرة ده عمرو كلو كان زول طيبان ومسالم، وما بعرف حروب ولا دمار ولا أسلحة ولا يحمل في يده غير العصي لاحقوا في حلتو ليه؟
□ مافي زول متخيل الحاجة دي والله ممكن تحصل نهائي
في صدمة كبيرة عند المواطن من البحصل ده!
□ الجزيرة دي يا جنجويدي لو ما انت عارف هي الولاية الوحيدة البتعتبر سودان مصغر، إحتضنت كل غرب السودان في قراها، وسكنو معاهم، واشتغلو معاهم، دون تمييز بل حتي دول كتشاد ونيجيريا والنيجر وأفريقيا الوسطى، واستوطنوا معاهم، وقاسموهم الملح الملاح.
□ لكن الناس إن شاء الله تكون وعيت وعرفت العدو الحقيقي، وأي بيت في الجزيرة دي بدل العكاز ح نسعي بندقية، وبدل السيف حنسعي دوشكا، وبنحرس بلدنا، ولا يلدغ المؤمن من جحر مرتين.

عصام السيمت

المصدر: موقع النيلين