مشتور يا ولدي مشتور

مشتور يا ولدي مشتور

د. #حسام_العودات

بالصف السابع رحت #رحلة_مدرسية عالبحر الميت ، مع إنه أبوي نصحني إني ما أروح عشان ما تخرب الرحلة على اولاد صفي ، كونه بعرف حظي

المهم ، يوم الرحله كان ببداية شهر ٤ ، يعني لازم ربيع ،

مقالات ذات صلة المقبرة 2023/12/22

لكن #الغيوم من الصبح كانت سودا

وبعد نص ساعه من بداية الرحلة ، بلش المطر ،

ولما وصلنا #البحر_الميت زاد الشتا ، لكن الجو ما كان بارد

وكوني ما بعرف اسبح الا بالطشت ، رفعت بنطلوني لتحت الركب ، وشلحت البوط الصيني ، وبلشت اتمشى على الشط

كثير من الولاد نزلوا يسبحوا تحت عين المعلمين المرافقين للرحلة

أني ظليت أتمشى بكل كبرياء على الشط ، لكن قويت قلبي ودخلت لجوا البحر لحتى صارت المي لحد عصاقيلي ( السيقان ) بالفصحى

ما بعرف كيف دعست على حجار البحر وتشركلت ووقعت بالمي

كل جسمي والأواعي تبللت بمية البحر المالحة ، وفوق هيك ، عيوني صارن مثل الدحنون من الملح

اثنين من طلاب صفي شالوني من المي ، وأخذوني جهة واحد من المعلمين ، وقالوله عن اللي صار معي

وانا بانتظار كلام التعاطف وفرك راسي بيده كرفع لمعنوياتي زي ما بصير مع اولاد الأجانب لما يحكولهم

، ولا يهمك يا عسل honey

اتطلع علي المعلم وقال : ليش ما درت بالك ، جعلك تموت ،

روح انقلع واقعد بالباص لبين ما يخلصوا هالغطاسين اللي بسبحوا

رحت عالباص مكسور الخاطر ، وبلشت الحكة بكل جسمي بعد ما بلش جسمي ينشف من المي شوي شوي

وطبعا ظليت بلا أكل بسبب الحكة والخذلان

ولا حدا رجع سأل عني ، وحسيت حالي منبوذ مثل البعير اللي مليان براغيث ومدهون بقطران

المهم خلصت الرحلة ووصلت لدارنا ، أمي قعدت تعيط لما شافت شعري أشعث وأغبر ، وجسمي من الملح صار مثل حبة الفجل

أبوي صار يقول : مش حرام عليك خربت الرحلة على اولاد صفك !!!!!!!!!؟ ، وبعدين المولود بملحوه خلال ٧ أيام ، مش بالصف السابع .

أني صحيح اتبهدلت ، بس والله ما انا زعلان من هظاك المعلم ، لإنه هو نفسه يوم الرحلة كان مهموم وعايف حاله ، وربنا بعلم شو ظروفه

لكن الرحله كانت خارطة طريق لحياتي اللي كلها مطبات ، ودوا جروحها ملح ، مش جونسون ولا ميبو

والحمد لله دائما وأبدا ، ولو طلع عبد الحليم حافظ كان غنالي : مشتور يا ولدي مشتور

المصدر: سواليف