هل تعود العاصمة كما كانت واجمل مما كانت ؟؟

عباره ساذجه بصراحه ويرددها البعض بلا وعى بل ويضيف لها فى سذاجه وستعود العاصمه احسن مما كانت !! وهو كلام يطلقه فى الهواء ولا يستند على وقائع بنى عليها حديثه والذين يعتقدون ان حميدتى وكل النازحين الذين احتلوا العاصمه سيعودون الى مناطقهم التى جاؤوا منها هؤلاء ساذجون واول سؤال اوجهه لمثل هذا المتفائل بلا اساس وهل عدت انت من العاصمه الى منطقتك ؟ او هل عاد ابوك او جدك بعد ان جاء مهاجراً من الاقاليم ؟ ان الوطن واظننا نتفق جميعاً على ذلك لا يتمتع ببنيه تحتيه فى كل اقاليمه والمنطقه الوحيده التى بها بنيه تحتيه اهترأت بعد الاستقلال وخروج المستعمر هى العاصمه وقد كنت مع الاسره فى العاصمه بعد الاستقلال والى بداية الانقلابات العسكريه فى ١٩٥٨ وقد ترك لنا المستعمر مدينه جميله ومنظمه ومخططه بدون عشوائيات وكنا نذهب من حى السكه الحديد الى المدرسه الشرقيه الاوليه مشياً وعندما تسير فى شارع القصر كانك تسير فى شارع فى احدى الدول الغربيه جميل ونظيف جدا ومنظم لا تجد مجرد ورقه مجدوعه فى الشارع وصدقونى كانك تسير فى شارع فى واشنطون وكان عمال النظافه يومياً ينظفون الشوارع العامه وكان سوق اللحمه والخضار وكان فى وسط سوق الخرطوم يغسل بالمياه والصابون وكانت الدكاكين والمكاتب كلها لديها عمال نظافه بل كان ضابط الصحه يلف على المنازل ويفتح الازيار ويفحص ان كان فيها نمتى ويفحص المنزل حماماته فاذا وجد اى وساخه او حشرات حتى لو امام منزلك تغرم وكل مواطن ينظف داخل وخارج مسكنه وكان فى العاصمه شركة مواصلات العاصمه وهى شركه تدير المواصلات فى العاصمه وباسعار رخيصه جداً يعنى فى بداية السبعينات التذكره من المحطه الوسطى امدرمان للمحطه الوسطى بحرى بتعريفه والتعريفة نص قرش والجنيه فيه مائة قرش واسعار الخضروات واللحوم رخيصه يعنى العامل بيشترى تقريباً كل يوم نصف كيلو لحمه ضانى ومعه الخضار والفواكه دا كل بيت والناس تطبخ بالضانى لم يكن هناك من يطبخ بالبقرى كان زى العيب كده وكانت هناك مساواه فى الاكل فالعامل والمدير كلهم اكلهم واحد ليس هناك فوارق طبقيه فى الماكل والملبس وكان الاغلبيه من اهل السودان يتمتعون بالاجازه فى كل سنه او سنتين تذهب الاسره الى قريتهم بالقطار اوالبصات والترحيل يدفعه مكان عملك ويحملوا معهم ماطاب من المدينه التى يسكنون فيها وكنا نذهب لبلدنا مساوى الجميله كل سنه تقريباً وننتظر الاجازه بشوق شديد والقرى ذاته كانت جميله وكانت المدارس مجانيه من الاوليه ( الابتدائى ) الى الجامعه مجاناً وهناك مدارس اوليه ووسطى وثانوى فيها داخليا يعنى اكل ودراسه مجاناً واتذكر حتى فى المطعم الفطور بقرشين اما جامعة الخرطوم ( الجميله ومستحيله ) فكانت مجاناً وهناك داخليات لمن يرغب وليس فقط التعليم مجاناً بل السكنى فى الداخليه مجاناً اكل راقى جداً وكانك فى فندق خمسه نجوم وكان ابن عمتنا محمد الحسن عوض الكريم قد دخل جامعة الخرطوم فكنا انا والوالد نزوره احيانا فناكل معه وجبه فى السفره ويخدمنا السفرجيه والفطور كبد ولحوم وماتشتهى نفسك وغداء وعشاء وعصائر وفواكه بل ان بعض الطلاب يعطى اعانه ماديه من الدوله شهريه وتذاكر سفره وعوده فى الاجازه مجاناً وحتى هناك بعض الطلاب الفقراء من غير طلاب جامعة الخرطوم ياتوا لياكلوا فى الجامعه ولا يسالهم احد واتذكر فى السبعينات كانت تذاكر الطيران لاقل من٢٦ سنه ( تذاكر الشباب ) بنصف القيمه وكنا نتمتع بالسفر للخارج ونحن من اسر متوسطة الحال وعندما تسافر وانت شاب تنزل فى بيوت الشباب فى اوربا وهى مدعومه من الدول والمنظمات والاقامه والاكل شبه مجانى واتذكر فى باريس بيت الشباب كأنه فندق درجه اولى وتلتقى بالشباب من كل انحاء العالم وعندما زرنا الجزر اليونانيه لعدة ايام كنا نتجمع كشباب من كل انحاء العالم على شواطىء هذه الجزر ونقضى ليالينا على شاطىء البحر الابيض المتوسط لا فنادق ونلعب لعبات جماعيه وضحك وونسه حتى الصباح وكان العالم جميلاً والسودان اجمل ولم نكن نفكر فى هجره اطلاقاً وهى متاحه وكنت تذهب الى اى سفاره اوربيه تجلس فى كرسى وتسلم لك التاشيره فى نفس اليوم بكل احترام وتقدير واتذكر فى مدينة برايتون فى بريطانيا التقيت بمصرى وصادقته وهو يسكن فى شقه لوحده وطلب منى ان استقر معه واسكن معه فى الشقه وممكن ان اجد وظيفه بسهوله فى الشركه التى يعمل فيها واتذكر اننى قلت له والله لو ادونى رئيس وزراء بريطانيا مااقعد فى بريطانيا واخلى السودان ووالله كنت صادقاً فقد كان السودان جميلاً جميلاً جمال لا يوصف وماكان تستطيع ان تفارق السودان وهذا قبل ان نطمسه ونطمس معالمه بعد الاستقلال ونحطم بلادنا الجميله بايدينا وندمرها تماماً بل مازلنا نواصل التدمير بعد ان تركناها حطاماً .

محمد الحسن محمد عثمان
omdurman13@msn.com  

المصدر: سودانايل