شوية خرابيش مع هبة عبد العزيز

في البداية قلوبنا وعقولنا وأرواحنا، ودعمنا الكامل  لأخواتنا في فلسطين الحبيبة اللى بتتعرض لحرب إبادة جماعية وتطهير عرقى بمنتهى الوحشية واللإنسانية من الكيان الصهيوني المغتصب، ومطلوب ضغط وحشد أكبر من الميديا أكتر من كده بكتييييير  فى إطار إنسانى عربى قومى، ولكن كلمة ومن أول السطر.. السيادة المصرية ليست مستباحة ومصر تعمل لتهدئة الأوضاع في فلسطين الحبيبة.

- مواقف المشاهير من القضية الفلسطينية واضحة وباينة للجميع، وكل واحد هاياخد من الجمهور على قد ما عمل وقال وباع.

- صباح الخير من رفح.. القوافل والمساعدات المصرية لمعبر رفح أمر إيجابي جدا أتمنى إنه يزيد الفترة اللي جاية، بس ياريت دون مزايدات ومقالات وبوستات من إياها والخ الخ الخ..

- من أجمل أحداث العام بالنسبالي سعدت وشرفت بحضور الإحتفال ب اليوبيل الذهبى لنصر أكتوبر العظيم على أرض الفيروز ب شمال سيناء فى مدينة العريش بدعوة كريمة من أجهزة الدولة المختصة بالتعاون مع المجتمع المدني، أكثر من أربع زيارات في 2023 للعريش وناسها الطيبين بدأت بدعم مقاصد مصر السياحية وإنتهت بحضور إحتفالات شهر النصر، وأتمني الإستمرار ويبقى القادم أفضل في 2024..

- بعد قرارات الرئيس السيسى بزيادة أجور الموظفين.. أربع قنوات طلبوا زيادات والخامسة في الطريق … نفذوا فورا ملتزمين أوى يا خال !.

- صباح الخير من العاصمة.. طلب بسيط من الزملاء الأعزاء المعدين والمخرجين والمذيعين في مدينة الإنتاج الإعلامي.. ياريت نخلي بالنا من إختيار ضيوفنا خصوصا موضوع اللايف كوتش، مش كل واحد فاضي وقاعد في البيت وسمع كام حلقة لأستاذ أسامة منير وأخد كام كورس من المؤسسة إياها نقول عليه خلاص ده لايف كوتش!!!

- صباح الخير من المتحدة..حللت ضيفة على أون تايم منذ أيام، ولاحظت أنها تعمل وتلتزم بنوع خاص من المهنية التى أصبحت نادرة بكل آسف فى الوسط الإعلامى بشكل عام والرياضي بشكل خاص، وسعدت بعدها بالضربة الإعلامية القوية من الشركة المتحدة بالحصول على الحقوق الحصرية لمباريات منتخب مصر في تصفيات كأس العالم.. خطوة هايلة برافو واللي جاي أفضل بإذن الله … شكل وشى كان حلو عليهم ههههههه.

- نصيحة من هبة عبد العزيز مدير وحدة المراة.. الزيجات التي تتم بحثا عن تريند السوشيال ميديا غالبا تنتهي سريعا والفضايح بتكون مكانها شاشات الفضائيات ومواقع التواصل الإجتماعى ولكم في قصة حسن شاكوش وقصة نسرين طافش وقصة احمد سعد وقصة هنا الزاهد وغيره وغيره وغيره عبرة …إختاروا وإرتبطوا  واتجوزا من غير زيطة وزمبايطة وكفاية مسلسلات هابطة وتمثل ركيك

- زيادة بدل نقابة الصحفيين في أقل من ٣ أشهر بدل المرة مرتين حاجة تحسب أكيد للنقيب الأستاذ خالد البلشي حتى لو كانت الزيادة بتوجه عام من الدولة لكن دوره واضح وملموس

قالوا من بره المدينة.. ٣ مذيعات كلموا طوب الأرض عشان يرجعوا لدايرة الحصانة بس الرد كان إحنا في مرحلة التغيير!! ربنا معاكم

- سمعنا وضحكنا عن إعتزال  وعودة، وإعتزال وعودة الممثلة مني فاروق !! ياشيخة ده إنتي لو كنتي لاعيب كورة كان زمانك أخدتى وقت أطول من كدة، على العموم اللي كلمك عشان يدخلك في عمل درامي في رمضان اللي جاي كلم ٤٠ واحدة وبعتلهم نفس المسج على الواتس وكل واحدة وحظها بقى..

- قالوا في قلب المدينة.. في دمج قادم لقناة كبرت وصغرت وراحت وجت واتباعت وفي الآخر قالولها إحتمال نضمك على ولاد عمك..

- قريبا بمشاركة الدكتور "أشرف زكي" نقيب الممثلين والمهندس "جمال علام" رئيس إتحاد الكورة.. ستعلن مؤسسة مهنا للتنمية المجتمعية عن جائزة  الراحل الكاتب الصحفي "محمود بكري" للعمل العام بمعرض الكتاب القادم بإذن الله والتى أشرف بكونى المستشار والمتحدث الإعلامى بإسمها … إهدأ منا لروحه الكريمه، وإحياء لمعانى الإنسانية ونشر قيم الخير والحب والسلام  التى حرص على نهجها طوال رحلة حياته رحمه الله  ..

- غريبة …فات أسبوعين …  والهضبة مانزلش أغنية جديدة لعله خير ؟! وهوب قام نازل بأغنية شبابية عاطفية بنكهة المهرجانات وآخر مهلبية …  طيب مافيش كلميتن على لحن حلو كده عن غزة ياجدع كنوع من الدعم على الأقل بمناسبة المجزرة البشعة اللى بيتعرض لها أهلنا هناك !!  ياريت تخلي بالك ياهضبة من إختياراتك وتنوع فيها … عشان فيه ناس إختياراتها هتدمر حياتها !.

- خالص الدعوات بالشفاء للعزيز سيادة الوزير السابق "العامري فاروق" نائب رئيس النادي الأهلي …وربنا يخفف ويعافيه ويطمنا عليه آمين

- آخر حاجة:  سؤال رفيع  لبتوع البورصة كده..   والنبى يا عم هو  جرام الدهب دلوقتى بيعمل كام كيلو بصل وكام كيلو سكر 

المصدر: بوابة الفجر